कोल्हापुरात पीकविमा योजनेकडे शेतकऱ्यांनी फिरविली पाठ

कोल्हापुरात पीकविमा योजनेकडे शेतकऱ्यांनी फिरविली पाठ
कोल्हापुरात पीकविमा योजनेकडे शेतकऱ्यांनी फिरविली पाठ

कोल्हापूर : पंतप्रधान पीकविमा योजनेकडे शेतकऱ्यांनी यंदाही पाठ फिरवल्याचे चित्र आहे. जुलैच्या मध्यापर्यंत केवळ ४९ शेतकऱ्यांनी विमा उतरवला आहे. यामुळे शेतकरी मोठ्या संख्येने या योजनेत सहभागी होतील, ही अपेक्षा फोल ठरली आहे.

विम्याच्या निकषात जिल्ह्यातील शेतकरी बसत नसल्याचे चित्र आहे. मुळात जिल्ह्यात खरीप पिकाचे सरासरी उत्पादन अधिक आहे. शासनाने निश्‍चित करून दिलेल्या उंबरठा उत्पादनापेक्षा कमी उत्पादन येतच नाही. विम्याचा लाभ देण्यापूर्वी मंडलनिहाय दहा पीक कापणीचे प्रयोग घेतले जातात. एका मंडलमध्ये साधारण १० ते १४ गावांचा समावेश होतो. यातील अधिकाधिक गावात उंबरठा उत्पादनापेक्षा अधिक उत्पादन झाल्यास कमी उत्पादनाच्या गावांतील शेतकऱ्यांचे उत्पादनही सरासरीपेक्षा जास्त येते. यामुळे खरोखर नुकसान झालेल्या शेतकऱ्यांनाही विम्याचा लाभ मिळणे अवघड होते. 

मागील सात वर्षांतील उत्पादन गृहित धरून उंबरठा उत्पादन निश्‍चित केले जाते. यामुळे मंडलनिहाय पीक कापणी प्रयोग जिल्ह्यासाठी तोट्याचा आहे. तोच प्रयोग तलाठी सजानिहाय घेतल्यास खरोखरच्या नुकसानग्रस्त शेतकऱ्याला लाभ मिळू शकतो. कारण, एका सजामध्ये दोन, तीनच गावे समाविष्ट असतात. शासनाने जिल्हानिहाय तेथील भौगोलिक परिस्थिती, पीक अहवाल, पावसाचे प्रमाण याचा अभ्यास करून निकष ठरवणे आवश्‍यक असल्याची मागणी आहे. 

एखादी योजना चांगली असली, तरी ती चुकीच्या निकषामुळे कशी अयशस्वी होते, याचे उत्तम उदाहरण जिल्ह्यातील स्थितीवरून लक्षात येते. वास्तविक अतिपावसाने, पाऊस न पडल्याने जिल्ह्यातील हजारो शेतकऱ्यांच्या पिकाचे नुकसान यापूर्वीही झाले आहे. विमा योजनेचे निकष जिल्ह्यासाठी वेगळे असले असते, तर लाभ मिळण्याची स्थिती वेगळी असती. योजनेमध्ये अनेक त्रुटी असल्याने जिल्ह्याला याचा अपेक्षित लाभ मिळू शकत नसल्याची स्थिती आहे

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com