शेतकऱ्यांनी कीटकनाशके फवारताना काळजी घ्यावी

गोंडपिपरी, जि. चंद्रपूर ः शेतकरी बांधवांनी पिकांवर कीटकनाशकांची फवारणी करताना काळजी घेणे गरजेचे आहे. विषबाधा झाल्यास त्याची लक्षणे ओळखून तातडीने उपचार करावा. तसेच वाटप करण्यात आलेल्या फेरोमोन ट्रॅप ल्यूरचा नियोजनबद्ध वाफर करावा, असे आवाहन गोंडपिपरीचे तालुका कृषी अधिकारी मंगेश पवार यांनी केले.

गोंडपिपरी तालुका कृषी अधिकारी कार्यालय, कृषी केंद्र संचालक संघटना व पंचायत समिती कृषी विभागाच्या माध्यमाने आज पंचायत समिती सभागृहात ‘कीटकनाशक फवारणी करतेवेळी घ्यावयाची काळजी’ यावर कार्यशाळा घेण्यात आली. तसेच फेरोमोन ट्रॅप ल्यूरचे वितरण हा कार्यक्रम घेण्यात आला. या वेळी मार्गदर्शन करताना ते बोलत होते. अध्यक्षस्थानी संवर्ग विकास अधिकारी शेषराव बुलकुंडे होते. तर पंचायत समितीचे उपसभापती मनीष वासमवार यांनी कार्यक्रमाचे उद्‍घाटन केले. 

कृषी केंद्र संचालक संघटनेचे अध्यक्ष भारत झाडे, मनोज नरहरशेट्टीवार, कृषी सहायक जी. बी. पाटील, डॉ. प्रशांत पेंदाम, आदी मान्यवर या वेळी उपस्थित होते. पहिल्या सत्रात पाटील यांनी कापूस सोयाबीन व धान पिकावरील कीड-रोगाची ओळख करणे. त्यावरील उपाययोजना कशी करावी, याबाबत सविस्तर माहिती दिली. यानंतर बिडीओ बुलकुंडे व उपसभापती वासमवार, भारत झाडे, मनोज नरहरशेट्टीवार यांच्या हस्ते उपस्थित शेतकरी बांधवांना फेरोमोन ट्रॅप ल्यूरचे वितरण करण्यात आले. हे साहित्य शेतकरी बांधवाच्या पिकवाढीसाठी कसे उपयुक्त ठरते याबाबतची विस्तृत माहिती देण्यात आली. 

डॉ. प्रशांत पेंदाम यांनी फवारणी करताना विषबाधा झाल्यास त्याची लक्षणे कशी ओळखायची व त्यावर तातडीने प्राथमिक उपचार करण्यासाठी काय करावे. या संदर्भात मार्गदर्शन केले. या वेळी प्रातिनिधिक स्वरूपात शेतकरी बांधंवाना सेप्टी किट देण्यात आल्या. संचालन पंचायत समितीचे कृषी अधिकारी ढवस यांनी केले. विविध विषयांवर घेण्यात आलेल्या या कार्यशाळेत तालुक्यातील शेतकऱ्यांची उपस्थिती होती.