शेतकऱ्यांनी उन्नत वाण बियाणे उत्पादित करावे ः डॉ. काळे

वाशीम ः शेतकऱ्यांनी उन्नत वाण बियाणे उत्पादित करून इतर शेतकऱ्यांना गाव पातळीवर दर्जेदार बियाणे उपलब्ध करण्यास हातभार लावावा. आपल्या शेतातील उत्पन्न दुप्पट करण्याच्या दृष्टिकोनातून शेतीपूरक व्यवसाय करावा. नवीन शिफारशीत वाणांचा व नवीन तंत्रज्ञानाचा वापर करून उत्पादन वाढीसोबतच उत्पन्न वाढवावे, असे आवाहन कृषी विज्ञान केंद्राचे प्रमुख डॉ. आर. एल. काळे यांनी केले.

वाशीम कृषी विज्ञान केंद्राद्वारे भारतीय कृषी संशोधन परिषद नवी दिल्ली व भारतीय सोयाबीन संशोधन संस्था इंदोर यांच्या संयुक्त विद्यमाने सोयाबीन पिकाचा समूह रेषा पीक प्रात्यक्षिक कार्यक्रम या हंगामात राबविण्यात आला. या प्रात्यक्षिकांमध्ये सुधारित वाण लागवड तंत्रज्ञानातून पीक उत्पादन वाढ, कीड व रोग व्यवस्थापन इत्यादी बाबींवर विशेष लक्ष देऊन सोयाबीन पिकाचे शिफारस तंत्रज्ञान वापराद्वारे उत्पादन वाढविण्यासाठी प्रयत्न करण्यात येतात. तसेच गाव पातळीवर नवीन वाणाच्या लागवडीद्वारे शेतकऱ्यांमध्ये तंत्रज्ञान प्रसार होतो. सोयाबीन प्रात्यक्षिकाअंतर्गत शेतकऱ्यांचे अनुभव व चर्चेकरिता कोंडाला झामरे येथे शुक्रवारी (ता. ११) कार्यक्रम झाला.

यावेळी कार्यक्रमाच्या अध्यक्षस्थानावरून डॉ. काळे बोलत होते. यावेळी प्रमुख पाहुणे म्हणून माजी सरपंच नितीन इंगोले, तसेच मार्गदर्शक म्हणून पीक संरक्षण तज्ज्ञ आर. एस. डवरे, फळबाग तज्ज्ञ एन. बी. पाटील, कृषी विद्या तज्ज्ञ टी. एस. देशमुख, कृषी अर्थतज्ज्ञ डी. एन. इंगोले उपस्थित होते.

प्रास्ताविक टी. एस. देशमुख यांनी केले. शेतकऱ्यांनी कृषी तंत्रज्ञान माहिती करून घेत पीक उत्पादन वाढविण्यासाठी कृषिदूत म्हणून कार्य करावे, असे आवाहन केले. सोयाबीन पारंपरिक पीक वाण जेएस ३३५ मध्ये खोडमाशी व खोडकिडीमुळे होणारे नुकसान टाळण्यासाठी सुधारित प्रतिकारक वाण एमएयूएस १५८ चा वापर करण्याची शिफारस त्यांनी केली. नितीन इंगोले यांनी कृषी विज्ञान केंद्राद्वारे गावपातळीवर घेतल्या जाणाऱ्या विविध कृषी कार्यक्रमाबद्दल समाधान व्यक्त केले. शेतकरी अशोकराव तायडे यांनी पीक नियोजनाची माहिती दिली. एस. एम. बोदडे यांनी आभार मानले.