मावळात बैलपोळ्यानिमित्त चवरे खरेदीची लगबग

टाकवे बुद्रुक, जि. पुणे  : बळिराजाच्या हौशेचा सण अर्थात बैलपोळा हा अवघ्या चार दिवसांवर येऊन ठेपला आहे. त्यानिमित्त परंपरेने बैलांच्या शिंगावर पळसाची चवरे बांधण्याकडे शेतकऱ्यांचा कल असतो. त्या चवरांची विक्री सध्या गावोगावी होत असून, ती विकत घेण्यासाठी शेतकऱ्यांची लगबग सुरू आहे. 

मावळ तालुक्‍यात शनिवारी (ता. २८) भाद्रपद पोळा साजरा होणार आहे. त्यानिमित्ताने शहरातील बाजारपेठा बैल सजावटीच्या वस्तूंनी सजल्या आहेत. याशिवाय आंदर मावळातील सटवाईवाडी, कुसवली, कांब्रे पठार, कळकराईतील चवरे गुंफणारे कारागीर विक्रीसाठी गावोगावी फिरत आहेत. नायलॉनच्या चवरांपेक्षा पळसाच्या चवरांना अधिक मागणी असते. पळसाच्या मुळ्या कुटून त्यापासून ही चवरे तयार केली जातात, ही चवरे गुंफणारे मोजकेच कारागीर आहेत. शंभर ते एकशे वीस रुपये प्रतिनग याप्रमाणे चवरे विक्री करीत असल्याचे, सटवाईवाडीतील कारागीर विष्णू हेमाडे यांनी सांगितले. वडेश्‍वर, माऊ, दवणेवाडी, टाकवे बुद्रुक, फळणे, कान्हे या गावांसह वडगाव मावळ, कामशेत, तळेगाव दाभाडे, लोणावळ्याच्या बाजारपेठेत ही चवरे विक्रीसाठी उपलब्ध आहे.