शेतकरी संघटनांच्या कार्यकर्त्यांवर पोलिसांची नजर

नाशिक : शेतकरी आंदोलनाचा केंद्रबिंदू राहिलेल्या नाशिक जिल्ह्यात पंतप्रधान नरेंद्र मोदी यांची सभा आज (ता.२२) येथे होत आहे. या पार्श्वभूमीवर पोलिसांनी शेतकरी संघटनांचे पदाधिकारी आणि कार्यकर्त्यांना दूरध्वनी वरून नजरकैदेत राहण्यासंदर्भात सूचना केल्याने संताप व्यक्त केला जात आहे.  लोकसभा निवडणुकीच्या पार्श्वभूमीवर दिंडोरी, नाशिक व धुळे येथील उमेदवारांच्या प्रचारार्थ पिंपळगाव बसवंत येथे पंतप्रधान मोदी यांची आज सकाळी ९ वाजता पिंपळगाव बसवंत येथे प्रचारसभा होत आहे. या सभेत कुठलाही अनुचित प्रकार घडू नये, या यासाठी पोलिसांनी खबरदारी घेतली आहे. 

शेतकरी संघटनेचे कार्यकर्ते व आंदोलक शेतकरी यांना नजरकैदेत राहण्याच्याबाबत संपर्क साधला आहे. नाशिक जिल्ह्यातील विविध तालुक्यांतील शेतकऱ्यांना पोलिसांकडून शेतकऱ्यांना दूरध्वनी गेले असून लवकरात लवकर ताब्यात राहण्याबाबत सांगण्यात आले. 

नाशिक जिल्ह्यातील शेतकरी आंदोलक, मराठा आरक्षण आंदोलन, समृद्धी महामार्ग संघर्ष समिती आंदोलनातील दाखल कोणतेही गुन्हे मागे घेतले नाहीत. मुख्यमंत्री घोषणा करतात गुन्हे मागे घेण्याची फक्त. प्रश्न विचारणाऱ्याचा आवाज दाबण्याचा प्रयत्न लोकशाहीला मारक आहे. अहिंसेच्या मार्गाने होणाऱ्या आंदोलनास परवानगी दिली पाहिजे. प्रत्यकाचे अभिव्यक्ती स्वातंत्र्य अबाधित राखले जाणे आवश्यक आहे. संविधानिक पद्धतीने होणाऱ्या आंदोलनास परवानगी दिली पाहिजे. पिंपळगाव येथे निदर्शने आंदोलनास इपीएस 95 पेन्शनर्स फेडरेशन नाशिक यांच्या वतीने परवानगी मागितली आहे. आम्ही निवडणुकीच्या प्रचारात तालुक्याबाहेर व्यस्त आहोत. मात्र आम्हाला पोलिसांचे फोन आले. लवकरात लवकर नजरकैदेत राहण्याबाबत पोलिसांकडून सांगण्यात आले आहे. आम्ही सूचनेप्रमाणे हजर राहू मात्र आमच्या जेवण व चहापाण्याची रीतसर सोय करावी. दिवसभर काळजी घ्यावी. - सुधाकर मोगल, जिल्हाध्यक्ष,  स्वाभिमानी शेतकरी संघटना.

निवडणुका जवळ आल्यावर राजकीय पक्षनेते आश्वासन देतात. मत मिळवून घेतात. सत्तेत आल्यावर विसरतात. त्यांना आठवण करून देणे लोकशाहीत गुन्हा कसा ठरू शकते? ज्यांनी फसवणूक केली त्यांना पोलिस जाब विचारत नाहीत. मात्र फसवणूक झालेल्या ना कायदा सांगितला जातो. निवडणुकीत दिलेले आश्वासन न पाळणाऱ्याना जाब विचारणे लोकशाहीत गुन्हा कसा?  - राजू देसले, कार्याध्यक्ष,  अखिल भारतीय किसान सभा