नगर ः संपूर्ण कर्जमाफी करून राज्यातील शेतकऱ्यांचा सातबारा कोरा करण्यासह अतिवृष्टीमुळे पिकांच्या झालेल्या नुकसानीची भरपाई द्यावी आणि यासह इतर मागण्यांसाठी गुरुवारी (ता. १२) शेतकरी संघटनेतर्फे राज्यभर निर्बंधमुक्ती आंदोलन केले जाणार आहे. त्यात सर्व शेतकरी संघटनेचे कार्यकर्ते आणि शेतकरी सहभागी होतील, असे संघटनेचे प्रदेशाध्यक्ष अनिल घनवट यांनी सांगितले.
घनवट म्हणाले, ‘‘महाराष्ट्राच्या २०१९ च्या विधानसभा निवडणुकीत संपूर्ण कर्जमाफी करून सातबारा कोरा करण्याबाबत जाहीरनामे दिले. ती आश्वासने देणारे पक्षच सत्तेत आले आहेत. एक महिना तर सरकार स्थापनेला लागला, आता मंत्र्यांच्या खातेवाटपाचा घोळ सुरू आहे. शेतकऱ्यांना कर्जमुक्ती व नुकसान भरपाई देण्याबाबत चर्चा सुद्धा होताना दिसत नाही. एकतर शेतकऱ्यांवर असलेले कर्ज सरकारच्या चुकीच्या धोरणांमुळे आहे. शेतकऱ्यांना चुकीचे अनुदान मिळत असल्यामुळे शेतकरी कर्जबाजारी झाला आहे. संघटनेने हे सतत चाळीसवर्षे पुराव्यानिशी मांडलले आहे. संपूर्ण कर्जमाफी व वीजबिल मुक्त होणे हा शेतकऱ्यांचा हक्क आहे. शेतकरी अत्यंत बिकट परिस्थितीतून जात आहे, त्याला तातडीने आर्थिक साहाय्य मिळणे आवश्यक आहे. मागील सरकारने अतिवृष्टीग्रस्त शेतकऱ्यांना जाहीर केलेल्या तुटपुंज्या मदती ऐवजी नुकसानग्रस्त शेतकऱ्यांना भरीव मदत देण्यात यावी, अशी शेतकरी संघटनेची मागणी आहे.’’
सर्व शेतीमाल बाजार समितीतून नियमनमुक्त करून शेतकऱ्यांना व्यापार स्वातंत्र्य द्यावे. नवीन, जनुक सुधारित (जेनिटिकली मॉडिफाइड) बियाणे व तंत्रज्ञान वापरावरील बंदी हटवून तंत्रज्ञान स्वातंत्र्य द्यावे. अतिवृष्टीमुळे शेतात पिकलेल्या कापूस व इतर धान्य कडधान्यांचा दर्जा घसरला आहे तो सरकारी खरेदीच्या निकषात बसत नाही. शासनाने हे निकष शिथील करून एफ. ए. क्यूची अट रद्द करून शेतकऱ्यांकडील शेतमाल खरेदी करावा. महाराष्ट्रात कमाल जमीन धारणे सारखा कालबाह्य झालेला कायदा अस्तित्वात आहे. जमिनीच्या किमतीवर मर्यादा येतात हा कायदा रद्द करणे राज्य सरकारच्या कक्षेत असल्यामुळे तो रद्द करावा, अशी संघटनेची मागणी आहे.
...त्यानंतर बेमुदत आंदोलन गुरुवारी (ता. १२) सकाळी ११ पासून ४ वाजेपर्यंत शेतकरी सरकारी कार्यालयासमोर शांततेत आंदोलन करतील त्यानंतरही १० दिवसांत शासनाने मागण्या मान्य न केल्यास मात्र, बेमुदत रस्ता रोको आंदोलन करणार असल्याचे घनवट यांनी सांगितले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.