बारदान्याच्या ६५ कोटींची शेतकऱ्यांना प्रतिक्षा 

भंडारा: गेल्या खरीप व रब्बी हंगामात स्वतःचा बारदाना देऊन शेतकऱ्यांनी धान विक्री केली. त्यापोटी प्रति नग २० रुपये ८६ पैसे शेतकऱ्यांना मिळणे अपेक्षित होते. यासाठी ६४ कोटी ८५ लाख ७५ हजार ८४ रुपयांचा निधी मिळाला. मात्र त्याचे वाटप हेतुपुरस्सर केले जात नसल्याचा आरोप सडक अर्जुनी बाजार समितीचे संचालक रोशन बडोले यांनी केला आहे. 

अन्न नागरी पुरवठा व ग्राहक संरक्षण विभागाच्या वतीने २७ ऑक्टोबरला आदेश काढण्यात आले. त्यानुसार, शेतकऱ्यांनी धान विक्रीच्या वेळी आपला बारदाना दिला असेल तर त्याची रक्कम संबंधित शेतकऱ्यांच्या बँक खात्यात जमा करण्यात यावी, असे निर्देश आहेत. आदिवासी विकास महामंडळ देवरी अंतर्गत सन २०१९-२० या हंगामात २८ केंद्रावर धान खरेदी करण्यात आली. नवेगाव बांध अंतर्गत १६ केंद्रावर १८६३७ व बिगर आदिवासी शेतकरी २८८८२ तर देवळी क्षेत्रातील ३४१० शेतकऱ्यांनी आधारभूत केंद्रावर आपल्या धानाची विक्री केली. दोन्ही कार्यालयांमार्फत १३ कोटी २३ लाख ३० हजार ३३ रुपयांचे धान खरेदी करण्यात आले. 

या हंगामासाठी बालाजी कार्पोरेशन (गोंदिया) व शुभलक्ष्मी राइस इंडस्ट्रीज (गोंदिया) यांनी महामंडळा सोबत एकदा वापरलेला ५० किलो वजनाचा बारदाना पुरवठा करण्याबाबत करारनामा केला होता. परंतु बालाजी कार्पोरेशन यांना रब्बी हंगामातील ८ मे रोजी महामंडळाने पुरवठा आदेश दिला. २७ ऑगस्टपर्यंत मुदत असताना देखील बारदाना पुरवठा करण्यात आला नाही. त्यामुळे शेतकऱ्यांकडून एकदा वापरलेला ११ कोटी ६३ लाख १२९ बारदाना जमा झाला. यासाठीची रक्कम शेतकऱ्यांच्या खात्यात जमा व्हावी त्याकरिता निधी मिळावा, अशा मागणीचा प्रस्ताव आदिवासी विकास महामंडळ भंडाराच्या वतीने शासनाला देण्यात आला होता.  शेतकऱ्यांची दिशाभूल  महामंडळाचे व्यवस्थापक यांनी १५ जुलै २०२० रोजी ६४ कोटी ८४ लाख ७५ हजार ५८४ रुपयांचा निधी शेतकऱ्यांच्या खात्यात जमा झाल्याचे सांगितले. मात्र अद्यापही शेतकऱ्यांच्या खात्यात रक्कम जमा झाली नाही. दिशाभूल थांबवीत शेतकऱ्यांच्या खात्यात ही रक्कम त्वरित जमा करावी, अशी मागणी रोशन बडोले यांनी केली आहे.