बोंड अळीच्या नुकसानीचे अनुदान दिवाळीपूर्वी मिळालेच नाही

अकोला : अाधीच अनेक दिवसांपासून रखडलेले बोंड अळी नुकसान अनुदान जिल्हा यंत्रणांना मिळाले खरे मात्र सलग सुट्या व दप्तरदिरंगाईचा फटका यावेळीही बसला. शेतकऱ्यांना दिवाळीपूर्वी बोंड अळीमुळे झालेल्या नुकसानीचे अनुदान मिळेल, अशी अपेक्षा असताना अद्यापही वितरण सुरू झालेले नाही. अधिकारी-कर्मचारी सुट्यांवरून परतल्यावरच हे अनुदान शेतकऱ्यांच्या खात्यात जमा होण्याचा मार्ग मोकळा होईल.  

मागील वर्षात बोंड अळीमुळे झालेल्या कपाशी पीक नुकसानीची भरपाई म्हणून शासनाने अनुदान जाहीर केले होते. हे अनुदान टप्प्याटप्प्याने दिले जात अाहे. शिवाय अालेल्या निधीचा वाटप हा इंग्रजी वर्णमालेनुसार केला जात अाहे. अाधी प्राप्त झालेले दोन टप्पे वितरित झाले. वऱ्हाडातील शेतकऱ्यांसाठी तिसऱ्या टप्प्यात सुमारे ९५ कोटींचा निधी दिवाळीपूर्वी वर्ग करण्यात अालेला अाहे. यात अकोला जिल्ह्यातील शेतकऱ्यांसाठी ४५ कोटी १७ लाख ७४ हजार, बुलडाणा जिल्ह्यासाठी ४४ कोटी ७८ लाख ३६ हजार अाणि वाशीम जिल्ह्यासाठी ५ कोटी १२ लाख ५८ हजारांचा निधी होता.

शासनाने एक नोव्हेंबरला कापूस, धान उत्पादकांसाठी तिसऱ्या टप्प्याचा निधी अमरावती, नागपूर, अौरंगाबाद, नाशिक या विभागांना पाठवला. त्याला अाता जवळपास १० दिवसांपेक्षा अधिक कालावधी पूर्ण झाला आहे. जिल्हा यंत्रणांकडून तालुक्यांना व तेथून बँकांमार्फत शेतकऱ्यांच्या खात्यात हे अनुदान जमा केले जाणार अाहे. अनुदानाचा तिसरा टप्पा मिळण्यापासून हजारो शेतकरी सध्या वंचित राहलेले अाहेत.

किमान हा निधी तातडीने मिळाला तर रब्बीसाठी शेतकऱ्यांना फायदेशीर झाला असता. सोमवारपासून (ता. १२) शासकीय कार्यालये पूर्ववत झाली अाहेत. मात्र अाठवड्याच्या पहिल्या दिवशी शासकीय कार्यालयांमध्ये जेमतेमच उपस्थिती दिसत होती. शिवाय दिवाळी सुट्यांचा ‘मूड’सुद्धा कायम होता. मध्यंतरी बँकांनाही सुटी असल्याने निधी मिळण्यास अडथळे निर्माण झाले. या अाठवड्यात हा निधी शेतकऱ्यांच्या खात्यांची खातरजमा केल्यानंतर वळती करण्याची प्रक्रिया सुरू होईल, असे सूत्रांकडून सांगण्यात अाले.