शेतकरी करणार नाना पटोले यांचा सत्कार

अकोला  ः जिल्ह्यातील शेतकऱ्यांचे प्रश्‍न तसेच ओबीसींना न्याय मिळवून देण्यासाठी काम करणारे विधानसभेचे अध्यक्ष नाना पटोले यांचा मंगळवारी (ता. २८) शेतकरी तसेच इतर संघटना जाहीर सत्कार करणार आहेत. या कार्यक्रमाच्या आयोजनाबाबत सेवानिवृत्त उपजिल्हाधिकारी तथा काँग्रेस नेते अशोक अमानकर यांनी बुधवारी (ता. २२) पत्रकार परिषदेत दिली. विधानसभेचे अध्यक्ष झाल्यानंतर नाना पटोले पहिल्यांदाच जिल्ह्यात येणार आहे. हे निमित्त साधून नाना पटोले मित्र मंडळाच्या वतीने मंगळवारी (ता. २८) त्यांच्या नागरी सत्काराचे आयोजन शहरातील कौलखेड रिंग रोडवरील जानोरकर मंगल कार्यालयात होत आहे. श्री. पटोले यांचा सत्कार गुरुदेव सेवा मंडळाचे राष्ट्रीय कीर्तनकार उद्धवराव गाडेकर यांच्या हस्ते होईल. या कार्यक्रमाला अध्यक्ष म्हणून सप्तखंजेरी वादक प्रबोधनकार सत्यपाल महाराज राहणार आहेत. या सत्कार सोहळ्यात सर्व ओबीसी संघटना, सेंद्रिय शेतमाल उत्पादक मंडळ, पारस प्रकल्पग्रस्त शेतकरी, राष्ट्रीय महामार्ग प्रकल्पग्रस्त शेतकरी सहभागी होणार असल्याचे श्री. अमानकर यांनी सांगितले. या पत्रकार परिषदेला मुरलीधर राऊत, श्रीकृष्ण इंगळे, मधुकर सरप, तुळशीदास बोदडे, राजदत्त मानकर आदींची उपस्थिती होती.