शेतकऱ्यांना धनदांडग्यांचे मजूर होऊ देणार नाही : राहुल गांधी

लुधियाना, पंजाब: कॉंग्रेस पक्ष शेतकऱ्यांना धनदांडग्यांचे मजूर होऊ नेणार नाही आणि केंद्रात सत्तेत येताच तीनही कृषी कायदे रद्द करेल असे आश्‍वासन कॉंग्रेसचे नेते राहुल गांधी यांनी येथे दिली.  लुधियाना येथे केंद्र सरकारच्या कृषी कायद्यांविरोधात रविवारी (ता.४) आयोजित ट्रॅक्टर रॅलीसमोर श्री. गांधी बोलत होते. राहुल गांधी म्हणाले,‘‘अंबानी आणि अदानी यांनी शेतजमीन आणि शेतमालाची खरेदी करावी अशी इच्छा नरेंद्र मोदी यांची आहे. तुम्ही संपूर्ण देशाला अन्न पुरविता आणि आता मोदी तुमचा हमीभाव काढून तुम्हाला अंबानी आणि अदानी यांचे मजूर करण्याच्या तयारी आहेत. तुम्हाला आश्वासित करतो, की भारतातील शेतकऱ्यांना मी त्यांचे मजूर होऊ नेणार नाही. आम्ही आमचे जीवनसंपवू मात्र, भारतीय शेतकऱ्यांना कोणाचेही गुलाम होऊ देणार नाही.’’ श्री. गांधी म्हणाले,‘‘आपण एकत्रितरीत्या या कायद्यांना संपूया. कॉंग्रेस पक्षाचा प्रत्येक कार्यकर्ता शेतकऱ्यांबरोबर उभा असेल आणि मी आश्‍वासित करतो, ज्या दिवशी कॉंग्रेस केंद्रात सत्तेत येईल, त्यादिवशी तीनही कृषी कायद्ये आपण फाडून-फेकून देऊ.’’ या तीन कायद्यांवर प्रश्‍न उपस्थित करत राहुल गांधी म्हणाले, की कोरोनाच्या काळात गरिबांना आणि शेतकऱ्यांना एकही रुपयाची मदत न करता, या कायद्यांच्या अंमलबजावणीबाबत एवढी घाई का करण्यात  आली?   प्रतिक्रिया जोपर्यंत तीनही कायद्यांमध्ये हमीभाव सक्तीची तरतूद करण्यात येत नाही, तोपर्यंत त्यांनी दिलेल्या आश्‍वासनांचा काहीच उपयोग होणार नाही. -अमरिंदर सिंग, मुख्यमंत्री, पंजाब

अमेरिकेत अपयशी ठरलेली व्यवस्था भारतातील शेतकऱ्यांवर लादण्याचा प्रकार केला जात आहे. भांडवलशाह हा देश चालवत आहेत. शेतकऱ्यांना देण्यात येत असलेल्या मदतीला अनुदान म्हटले जाते आणि श्रीमंतांना देण्यात येणारी मदत ही प्रोत्साहन निधी म्हटले जाते. - नवज्योतसिंग सिद्धू, आमदार, पंजाब