पंतप्रधान पीकविमा योजनेचा कोट्यवधी शेतकऱ्यांना लाभ : पंतप्रधान नरेंद्र मोदी

नवी दिल्ली : गेल्या पाच वर्षांत पंतप्रधान पीकविमा योजनेची व्याप्ती वाढत, जोखीम कमी झाली असून, योजनेचा कोट्यवधी शेतकऱ्यांना लाभ झाला असल्याचे प्रतिपादन पंतप्रधान नरेंद्र मोदी यांनी केले आहे.  २०१६ पासून सुरू करण्यात आलेल्या पंतप्रधान पीकविमा योजनेस पाच वर्षे पूर्ण झली. यानिमित्त पंतप्रधान नरेंद्र मोदी यांनी लाभार्थी शेतकऱ्यांचे ट्विट करून अभिनंदन केले. ‘‘नैसर्गिक आपत्तीपासून कष्टकरी शेतकऱ्यांचे संरक्षण करणाऱ्या पंतप्रधान पीकविमा योजनेने पाच वर्षे पूर्ण केली आहेत. योजनेची व्याप्ती वाढली असून, जोखीम कमी करून करोडो शेतकऱ्यांना त्याचा लाभ झाला आहे. मी सर्व लाभार्थी शेतकऱ्यांचे अभिनंदन करतो,’’ असे या ट्विटमध्ये म्हटले आहे.  ‘‘पीकविमा योजनेने शेतकऱ्यांना अधिकाधिक लाभ कसे दिले? पीकविमा योजनेतील दाव्यांचा तोडगा काढण्यात पारदर्शकता कशी दिली गेली? यासह इतर संबंधित पैलूंबाबतचे उत्तर नमो ॲपच्या माध्यमातून नावीन्यपूर्ण तपशिलांतून देण्यात आले आहे,’’ असे पंतपधान मोदी यांनी यासंदर्भातील दुसऱ्या ट्विटमध्ये म्हटले आहे.   दरम्यान, केंद्रीय कृषिमंत्री नरेंद्रसिंह तोमर यांनी शेतकऱ्यांना विम्याद्वारे पीक संरक्षित करण्याचे या निमित्ताने आवाहन केले. भारतीय कृषी संशोधन परिषदेनुसार दरवर्षी सुमारे ५.५ कोटी शेतकरी पीकविमा काढतात.