राज्यात पावसाला पोषक हवामान

पुणे : राज्यात पावसाला पोषक हवामान होत असल्याने मॉन्सून सक्रिय होण्याची शक्यता आहे. उद्यापासून (ता.१३) राज्यात पाऊस सुरू होणार असून, कोकण, मध्य महाराष्ट्रात तुरळक ठिकाणी जोरदार पावसाची, विदर्भ मराठवाड्यात हलक्या ते मध्यम पावसाचा अंदाज हवामान विभागाने वर्तविला आहे.  

मॉन्सूनचा आस असलेला कमी दाबाचा पट्टा हिमालयाच्या पायथ्याकडे सरकला आहे. तर पश्चिम किनारपट्टीला समांतर कमी दाबाचा पट्ट्याचा विस्तार कमी झाल्याने राज्यात पावसाने काहीशी उघडीप दिली आहे. तर पाऊस सुरू असलेल्या भागातही जोर ओसरला आहे. मात्र उद्यापासून मॉन्सूनचा आस दक्षिणेकडे सरकण्याची शक्यता आहे. यामुळे कोकण किनारपट्टीसह मध्य भारतात पावसाला सुरुवात होण्याची शक्यता असल्याचे हवामान विभागाने स्पष्ट केले आहे. आज (ता.१२) कोकणातील ठाणे, रायगड, रत्नागिरी, सिंधुदुर्ग जिल्ह्यात तुरळक ठिकाणी जोरदार पावसाची शक्यता आहे. तर उर्वरित राज्यात ढगाळ हवामानासह हलक्या पावसाची शक्यता आहे.   

पावसाचा जोर ओसरला राज्यात विविध भागात सुरू असलेल्या पावसाने काहीशी उघडीप दिली आहे. तर कोकण, घाटमाथा, धरणांच्या पाणलोटात सुरू असलेल्या पावसाचा जोरही ओसरला आहे. शनिवारी (ता.११) सकाळपर्यंतच्या २४ तासांमध्ये कोकणात काही ठिकाणी तर उर्वरित महाराष्ट्रात तुरळक ठिकाणी हलक्या ते मध्यम पावसाच्या सरी कोसळल्या. पावसाने उघडीप दिल्याने वाढीच्या अवस्थेत असलेल्या खरीप पिकातील मशागतीच्या कामांना वेग आला आहे. काही ठिकाणी पावसाची दडी असल्याचे दिसून येत आहे.  शनिवारी सकाळपर्यंतच्या २४ तासांत  पडलेला पाऊस (मिलिमीटरमध्ये)      कोकण : जव्हार ४४, पालघर ३५, विक्रमगड ३०, महाड ४०, पोलादपूर ३६, दापोली ५६, हर्णे ५०, खेड ३४, रत्नागिरी ५७, संगमेश्वर ४०, दोडामार्ग ६२, कणकवली ३०, कुडाळ ४७, मालवण ३६, सावंतवाडी ५३, वेंगुर्ला ५४.

मध्य महाराष्ट्र : गगनबावडा ९१, इगतपुरी ४४, जत ३१. 

मराठवाडा : पैठण ३०, मंथा २०, लातूर २९, रेणापूर २२. 

विदर्भ : बटकुली २०, मोहाडी २१, अरमोरी २२, गडचिरोली ४३, कुरखेडा ४०, मुलचेरा २२, सेलू २४.