राज्यात पावसासाठी पोषक स्थिती 

पुणे ः बंगालचा उपसागर व दक्षिण आंध्रप्रदेश दरम्यान चक्रीय स्थिती तयार झाली आहे. ही स्थिती पावसासाठी पोषक ठरत आहे. त्यामुळे येत्या शनिवारपर्यंत कमीअधिक स्वरूपात पाऊस पडणार आहे. आज मंगळवारी (ता. २०) कोकण, मध्य महाराष्ट्र व मराठवाड्यात तुरळक ठिकाणी विजांच्या कडकडाटासह जोरदार पाऊस पडण्याचा अंदाज हवामान विभागाच्या सूत्रांनी वर्तविला आहे.  बंगालच्या उपसागराच्या पश्चिम भागात चक्रीय वाऱ्यांची स्थिती अजूनही कायम आहे. तर कर्नाटक किनाऱ्यापासून बंगालच्या उपसागरापर्यंत वाऱ्यांचे पूर्व पश्चिम जोडक्षेत्र सक्रिय झाले आहे. दरम्यान अरबी समुद्राच्या पश्चिम भागात कमी दाबाचे क्षेत्र असून त्याचे चक्राकार वाऱ्यामध्ये रूपांतर होण्याची शक्यता आहे. बंगालच्या उपसागराचा पश्चिम मध्य भाग व आंध्र प्रदेशाच्या दक्षिण भागात चक्राकार वाऱ्यांची स्थिती सक्रिय आहे. त्याचा परिणाम राज्यातील हवामानावर होण्याची शक्यता आहे. त्यामुळे पुढील काही दिवस ढगाळ हवामानासह कडाक्याचे ऊन पडणार असून अधूनमधून पाऊस पडणार आहे.  राज्यात तुरळक ठिकाणी जोरदार पाऊस पडत असल्याने सकाळी काही प्रमाणात धुके पडत असल्याची स्थिती आहे. उद्या (बुधवार) ठाणे, पालघर, रायगड, रत्नागिरी, सिंधुदुर्ग, धुळे, नंदुरबार, नाशिक, नगर, पुणे, सातारा, सांगली, सोलापूर, औरंगाबाद, बीड, जालना, परभणी, हिंगोली, नांदेड, लातूर, उस्मानाबाद या जिल्ह्यात तुरळक ठिकाणी मध्यम ते जोरदार पाऊस पडेल. गुरुवारी (ता. २२) ठाणे, रायगड, रत्नागिरी, सिंधुदुर्ग, नाशिक, नगर, पुणे, सातारा, सांगली, कोल्हापूर, औरंगाबाद, बीड, जालना, लातूर आणि उस्मानाबाद जिल्ह्यात मध्यम ते जोरदार पाऊस पडेल. तर विदर्भात तुरळक सरी पडतील.  शुक्रवारी (ता. २३) रायगड, रत्नागिरी, सिंधुदुर्ग, पुणे, सातारा, सांगली, कोल्हापूर जिल्ह्यात मध्यम स्वरूपाचा पाऊस पडणार असून मराठवाडा व विदर्भात काही अंशी ढगाळ वातावरणासह हलक्या सरी पडतील. त्यानंतर पावसाचा जोर कमी होण्याची शक्यता असून पावसाची काहीशी उघडीप राहणार आहे.