मॉन्सूनच्या माघारीस पोषक वातावरण 

पुणे : मॉन्सून दोन दिवसांत उत्तर महाराष्ट्र व अरबी समुद्राचा मध्य भाग, ओडिशा या भागांतून माघार घेणार आहे, अशी माहिती हवामान विभागाच्या सूत्रांनी दिली. 

सध्या मॉन्सूनच्या परतीच्या प्रवासासाठी अनुकूल स्थिती तयार झाली आहे. त्यामुळे झारखंड, छत्तीसगड, मध्य प्रदेश, गुजरात, उत्तर व मध्य अरबी समुद्र, ओडिशाचा काही भाग, पश्चिम बंगाल, सिक्कीम, तेलंगणा तसेच ईशान्य भारतातील सर्वच राज्य आणि महाराष्ट्रामधून दोन दिवसांत मॉन्सून परतीचा प्रवास सुरु करणार आहे. राज्याच्या सर्वच भागातून मॉन्सून एकाच वेळी परतणार आहे. 

दरम्यान, पुढील दोन दिवस राज्यात हलका ते मध्यम स्वरूपाचा पाऊस पडेल तसेच ऑक्टोबर हिटचा चटका देखील वाढेल, असा अंदाज हवामान विभागाने वर्तविला आहे.  २८ ऑक्टोबरला देशातून परतणार  बंगालच्या उपसागरातील तीव्र कमी दाबाचे क्षेत्र भूपृष्टावर येत आहे. त्यामुळे येत्या दोन दिवसांत परतीचा मॉन्सून उत्तर महाराष्ट्रातून माघार घेण्याची शक्यता असून २८ ऑक्टोबरला तमिळनाडू, आंध्र प्रदेश, कर्नाटक व केरळसह मॉन्सून संपूर्ण देशातून परतणार आहे, अशी शक्यता हवामान खात्याने वर्तविली.