अनुकूल हवामानामुळे यंदा दर्जेदार बेदाणानिर्मिती

सांगली : यंदा बेदाणा निर्मितीसाठी अनुकूल हवामान होते. यामुळे दर्जेदार बेदाणा तयार झाला आहे. डिसेंबरच्या शेवटच्या आठवड्यापासून ते एप्रिलच्या पहिल्या आठवड्यापर्यंत बेदाणे हंगाम चालला. सुमारे चार महिने चाललेला हा हंगाम आता उरकला आहे.  कवठेमहांकाळ तालुक्‍यातील हवामान बेदाणा निर्मितीस पोषक आहे. यामुळे कवठेमहांकाळ तालुक्यात दर्जेदार बेदाणा तयार होतो. या परिसरात सुमारे ६ हजार बेदाणा शेड आहेत. यापैकी या हंगामात ९० टक्के शेडवर बेदाणा निर्मिती झाली. येथे कोरडे व भरपूर सूर्यप्रकाश असे हवामान असल्याने चार किलो द्राक्षांपासून सुमारे एक ते दीड किलो बेदाणा तयार होतो. यंदा द्राक्ष हंगामाच्या सुरवातीपासूनच पाण्याची टंचाई होती. टॅंकरने पाणी देऊन द्राक्ष बागा जगविल्या. यंदाच्या हंगामात ३५ हजार एकरांपेक्षा जास्त क्षेत्रावरील द्राक्षांपासून बेदाणा तयार झाला आहे.  जानेवारी ते मार्च महिन्यात अवकाळी पावसाची भीती असते. दोन वर्षांपूर्वी ऐन बेदाणा हंगामात अवकाळी पावसाने हजेरी लावली होती. त्यामुळे बेदाण्याचे मोठ्या प्रमाणात नुकसान झाले होते. गेल्या वर्षी बेदाणा हंगाम अवकाळी पावसातून निसटला. यंदाही अवकाळी पावसाचे वातावरण निर्माण झाले होते. त्यामुळे शेतकऱ्यांमध्ये काही प्रमाणात भीती निर्माण झाली होती. परंतू यंदा बेदाणा पट्ट्यात अवकाळी पाऊस झाला नाही. त्यामुळे बेदाणा उत्पादक शेतकऱ्यांमध्ये समाधानाचे वातावरण होते. बेदाणा तयार करण्यासाठी यंदा पोषक हवामान होते. पाऊस आणि गारपीट झाली नसल्याने दर्जेदार बेदाणा तयार झाला आहे. परिणामी बेदाण्यास चांगला दर मिळण्याची शक्यता शेतकऱ्यांनी वर्तविली आहे.