खते, बियाण्यांची दुकाने उघडी ठेवा : कृषी आयुक्तालयाचे पत्र

पुणे : कोरोनाच्या पार्श्वभूमीवर खते, बियाणे विक्री करणारी दुकाने उघडी ठेवावीत, असे आदेश राज्याच्या कृषी आयुक्तालयाने काढले आहेत. गुणनियंत्रण संचालक विजयकुमार घावटे यांनी राज्यातील सर्व जिल्हा अधीक्षक कृषी अधिकाऱ्यांना दिलेल्या लेखी सूचनेत ही माहिती दिली आहे. “ कोरोनामुळे १४४ कलम लागू असल्याने संचारबंदी असली तरी खरीप हंगाम तोंडावर आल्यामुळे शेतकऱ्यांना हंगामाच्या तयारीसाठी बियाणे, खते हवी आहेत. त्यामुळे अधिकाऱ्यांनी दक्षता घ्यावी,” असे आयुक्तालयाचे म्हणणे आहे. खते व बियाणे जीवनावश्यक वस्तू कायदा १९५५ मध्ये समाविष्ट आहेत. संचारबंदीमधून अत्यावश्यक सेवा वगळण्यात आलेल्या आहेत. त्यामुळे खते व बियाण्यांची दुकाने काही वेळेपुरती उघडी ठेवणे आवश्यक आहे, असे आयुक्तालयाने स्पष्ट केले. जिल्हा अधीक्षक कृषी अधिकाऱ्यांनी खते व बियाण्यांच्या विक्रीबाबत अडचणी असल्यास थेट जिल्हाधिकाऱ्यांशी चर्चा करावी, असे कृषी संचालकांनी सुचविले आहे. दुकाने उघडी ठेवण्यासाठी जिल्हाधिकाऱ्यांशी चर्चा करून आठवड्यातून काही दिवस सुरू ठेवण्याबाबत स्वतंत्र आदेश काढून घ्यावेत, असे गुणनियंत्रण संचालकांनी सुचविले आहे.