‘एमआरपी’नुसारच खतांची खरेदी करावी 

सोलापूर ः यंदाच्या खरीप हंगामाच्या पार्श्‍वभूमीवर जिल्ह्यातील शेतकऱ्यांनी ‘एमआरपी’नुसारच रासायनिक खतांची खरेदी करावी, असे आवाहन कृषी विभागाने केले आहे. 

खत विक्रेत्यांकडे सध्या जुन्या आणि नवीन दोन्ही प्रकारचा रासायनिक खतसाठा आहे. विक्रेत्याने जुना खतसाठा यापूर्वीच्या एमआरपीप्रमाणे विकणे बंधनकारक आहे. त्यामुळे शेतकऱ्यांनी रासायनिक खतांची खरेदी करताना विक्रेत्यांकडे ई-पॅास मशिनवरील बिलाचा आग्रह धरावा. जुन्या साठ्याचे दर त्यामुळे शेतकऱ्यांना समजतील. खरेदी केलेल्या खताची पक्की पावती घ्यावी, असे आवाहनही केले आहे. खरेदी केलेल्या पोत्यांवरील खताची एमआरपी आणि विक्रेत्यांनी दिलेले पक्के बिल तपासून घ्यावे. शेतकऱ्यांच्या अडचणी सोडविण्यासाठी जिल्हास्तरावर नियंत्रण कक्ष स्थापन करण्यात आला आहे. 

शेतकऱ्यांना काही तक्रार असल्यास त्यांनी ०२१७-२७२६०१३ या दूरध्वनी क्रमाकांवर संपर्क साधावा. ग्रामपंचायत स्तरावर जमीन सुपीक निर्देशांक फलक लावण्यात आले आहेत. त्यानुसार क्षेत्रीय स्तरावरील कृषी सहायक आणि कृषी पर्यवेक्षक यांचे मार्गदर्शन घेऊन जमिनीची सुपीकता निर्देशांकानुसार रासायनिक खतांचा संतुलित वापर करावा, असेही कृषी विभागाने दिलेल्या पत्रकात म्हटले आहे.