नगर जिल्ह्यात ग्रामपंचायतींनी लावलेली निम्मीच रोपे जिवंत

संग्रहित छायाचित्र
संग्रहित छायाचित्र

नगर : पर्यावरण संवर्धनाला प्राधान्य देत शासनाने वृक्षलागवड मोहीम सुरू केली आहे. या मोहिमेतून दोन वर्षांत (२०१६-१७ व २०१७-१८) जिल्ह्यात ग्रामपंचायतींच्या माध्यमातून पाच लाख ९७ हजार २०४ वृक्षांचे रोपण करण्यात आले. त्यातील सरासरी ६० टक्केच रोपे जिवंत आहेत. त्यात पहिल्या वर्षीची ५३.०१ तर दुसऱ्या वर्षीची ६२.९० टक्के रोपे जिवंत असल्याचे सांगण्यात आले.

दुष्काळावर मात करायची असेल तर झाडे लावा झाडे जगवा असे आवाहन करत शासनाने लोकसहभाग, वन विभाग, सामाजिक वनीकरण आणि अन्य सरकारी विभागासह शाळा, महाविद्यालये, ग्रामपंचायती आणि प्रत्येक नागरिकाच्या मदतीने वृक्षलागवड मोहीम सुरू केली आहे. त्यानुसार दोन वर्षांपासून राज्यात वृक्षलागवड केली जात आहे.

राज्यातील अनेक भागाला काही वर्षांपासून दुष्काळाला सामोरे जावे लागत आहे. वृक्षांची संख्या कमी झाल्यानेच दुष्काळाशी सामाना करावा लागत आहे. त्या पार्श्‍वभूमीवर राज्य सरकारने वृक्षलागवड मोहिमेत सहभागी होण्याचे नागरिकांना आवाहन केले होते. त्यानुसार यंदा या मोहिमेला प्रतिसादही चांगला मिळाला आहे.

जिल्ह्यामध्ये पहिल्या वर्षी ग्रामपंचायतीमार्फत १ लाख चार हजार १६ रोपांची लागवड करण्यात आली होती. त्यातील ५५ हजार १३६ झाडे जगली. लावलेल्या रोपांच्या तुलनेत ५३.०१ टक्के रोपे जगली. गतवर्षी ४ लाख ९३ हजार १८८ रोपांची लागवड केली. त्यातील ३ लाख १० हजार २३० म्हणजे ६२.९० टक्के रोपे आजमितीला जिवंत आहेत. पहिल्या वर्षी रोपे जगवण्यात कोपरगाव, राहाता, राहुरी पुढे आहे तर शेवगाव, नगर तालुक्‍यात सर्वांत कमी रोपे जिवंत असल्याचे स्पष्ट झाले आहे.

गतवर्षीची रोपे जिवंत ठेवण्यात अकोले, जामखेड, कर्जत, कोपरगाव, पाथर्डी, राहाता, श्रीगोंदा, राहुरी तालुके पुढे आहेत. शेवगाव, नगर मात्र मागेच असल्याचे जिल्हा परिषदेतून सांगण्यात आले.

यंदा चौदा लाख रोपांची लागवड यंदा ग्रामपंचायतींना वृक्षारोपण मोहिमेसाठी चांगला प्रतिसाद मिळाला. जिल्हा परिषदेअंतर्गत येणाऱ्या ग्रामपंचायत विभागासह अन्य विभागांनी यंदा गतवर्षीच्या तुलनेत तिप्पट वृक्षांचे रोपण केले आहे. यंदा जिल्हा परिषदेने लावलेल्या १४ लाख ७३ हजार १६४ रोपांपैकी १४ लाख ३२ हजार ०१८ रोपे ग्रामपंचायतीमार्फत लावण्यात आली आहेत. विशेष म्हणजे शासनाकडून दिलेल्या उद्दिष्टाच्या तुलनेत अधिक वृक्षारोपण झाले असले तरी त्यातील किती प्रमाणात वृक्ष जिवंत राहतात हे पाहणे महत्त्वाचे ठरणार आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com