गोंदिया जिल्ह्यात सिंचन विहीर योजनेचा उडाला फज्जा

गोंदिया ः जिल्ह्यात मागेल त्याला विहीर योजनेचा पुरता फज्जा उडाला आहे. जिल्ह्याला मिळालेल्या ११०० उद्दिष्टांपैकी ३८८ विहिरींनाच मंजुरी देण्यात आली असून, त्यांचेही काम गेल्या सात महिन्यांत पुढे सरकले नाही. प्रशासनाच्या या उदासीन धोरणाबद्दल शेतकऱ्यांमध्ये तीव्र प्रतिक्रिया उमटत आहेत.  आदिवासीबहुल आणि नक्षलप्रवण अशी गोंदिया जिल्ह्याची ओळख. धान (भात) हे या भागातील मुख्य पीक आणि शेती हेच रोजगाराचे मुख्य साधन. पावसाने खंड दिल्यास या भागातील शेतकरी, शेतमजुरांना रोजगाराच्या शोधात स्थलांतर करावे लागते. ही बाब लक्षात घेता शासनाने विदर्भात १३ हजार सिंचन विहिरींचा धडक कार्यक्रम हाती घेतला आहे. त्याअंतर्गत गोंदिया जिल्ह्याला २०१९-२० या वर्षाकरिता सुमारे ११०० विहिरींचे उद्दिष्ट आहे. त्या तुलनेत विहिरीची मागणी करणाऱ्या शेतकऱ्यांची संख्या अधिकच आहे. असे असताना जिल्हा परिषद लघू पाटबंधारे विभागाकडून आहे ते उद्दिष्ट साध्य होण्यासाठीदेखील प्रयत्न केले जात नसल्याचे वास्तव समोर आले आहे. २०१९-२० या वर्षातील सात महिने लोटले; परंतु आजवर एकाही विहिरीच्या बांधकामाला सुरवात झाली नाही. मंजुरी मिळालेल्या विहिरींचे वर्गीकरण केल्यास त्यामध्ये एक विहीर आत्महत्याग्रस्त कुटुंबाला देण्यात आली आहे. उर्वरित ३८७ विहिरी दारिद्र्य रेषेखालील व्यक्‍तींना मंजूर करण्यात आल्या आहेत. विशेष म्हणजे ११०० विहिरींचे उद्दिष्ट असलेल्या गोंदिया जिल्ह्यात आजवर सुमारे ४७८१ शेतकऱ्यांनी अर्ज केले आहेत. त्यातील ५९२ शेतकऱ्यांचे अर्ज अपात्र ठरले आहेत. तिरोडा तालुक्‍यातील १०४३ पैकी १५६ अर्ज पात्र ठरले आहेत.   तालुकानिहाय विहिरी