भाजीपाला, फळविक्रीवरून नगराध्यक्ष, उपनगराध्यक्षांमध्ये भररस्त्यात जुंपली 

सिंधुदुर्ग: परजिल्ह्यातील भाजीपाला आणि फळविक्रीस मनाई केली असतानाही सुरू असलेल्या विक्रेत्यावर नगराध्यक्ष महेश कांदळगावकर यांनी कारवाईस सुरूवात केली. ही कारवाई सुरू असतानाच उपनगराध्यक्ष राजन वराडकर आणि माजी नगराध्यक्ष सुदेश आचरेकर आक्षेप घेतला. या विषयावरून त्यांच्यामध्ये भररस्त्यातच चांगलीच जुपंली. 

दरम्यान, मुख्याधिकाऱ्यांनी विक्रेत्यांवर कारवाई न केल्यामुळे नगराध्यक्षांनी मुख्यधिकाऱ्यांची तक्रार पालकमंत्र्याकडे करणार असल्याचे स्पष्ट केले. 

परजिल्ह्यांमध्ये कोरोनाचे रूग्ण आढळुन येत असल्यामुळे पालिकेने परजिल्ह्यातील भाजीपाला आणि फळविक्री करू नये, असा निर्णय घेतला होता. तरीदेखील गाड्या लावुन भाजी आणि फळे विक्री करताना काही विक्रेते दिसुन आले. त्यामुळे नगराध्यक्ष श्री. कादंळगावकर, बांधकाम सभापती यतीन खोत आणि पालिकेच्या अधिकाऱ्यांनी या विक्रेत्यावर कारवाई करण्यास सुरूवात केली. ही माहीती उपनगराध्यक्ष आणि माजी नगराध्यक्षांना समजताच ते कारवाई सुरू असलेल्या ठिकाणी आले. त्यांनी कारवाईस आक्षेप घेतला. या विषयावरून त्यांच्यामध्ये रस्त्यावरच जोरदार शाब्दीक बाचाबाची झाली. नगराध्यक्षांनी नियमानुसार कारवाई सुरू असल्याचे सांगीतले. 

तर उपनगराध्यक्ष आणि माजी नगराध्यक्षांनी मुख्याधिकाऱ्यांची परवानगीनेच भाजी आणि फळविक्री सुरू आहे. त्यामुळे कुणीही हुकुमशाहीने विक्री बंद करू नये असे स्पष्ट केले. त्यामुळे तेथील वातावरण चांगलेच तापले. भररस्त्यातच हा वाद झाल्यामुळे बघ्यानीही तेथे गर्दी केली. नगराध्यक्ष निघून गेल्यानतंर भाजी व फळविक्री सुरू होती. 

दरम्यान मुख्याधिकाऱ्यांनी विक्रेत्यावर कारवाई न केल्यास त्यांच्यावर कारवाईची मागणी आपण पालकमंत्री उदय सांमत यांच्याकडे करणार असल्याचे नगराध्यक्ष श्री. कांदळगावकर यांनी स्पष्ट केले.