बाजरीच्या कणसात भरले अल्प प्रमाणात दाणे

बुलडाणा : शेतकऱ्यांनी पारंपरिक पिकांची वाट बदलून नवीन पीक पद्धती अंगीकारावी, असे सल्ले नेहमी दिले जातात. शेतकरीही यासाठी पुढे येतात. मात्र, प्रयत्न करूनही जर बियाण्यात दोष असेल तर शेतकरी फसतो. असाच प्रकार बाजरी पिकाबाबत जिल्ह्यात समोर आला आहे. देऊळगावराजा तालुक्यात काही शेतकऱ्यांची बाजरी कमी उगवली, काहींच्या पिकात कणसे, फुलोरा अत्यंत कमी प्रमाणात भरल्याने उत्पादन खर्चही निघण्याची शक्यता नाही. या बाबत कृषी विभागाकडे गोंधनखेड येथील शेतकऱ्याने तक्रारही केली आहे.

या बाबत मिळालेल्या माहितीनुसार देऊळगावराजा तालुक्यातील गोंधनखेड येथील सखाराम गिते यांनी यंदा रब्बीत बाजरीची लागवड केली होती. पीक चांगले जुळूनही आले. परंतु त्यावर अत्यल्प कणसे व त्यात दाणे भरले. फुलोरच आलेला नसल्याचे दिसून आले.

बियाण्याच्या माध्यमातून कंपनीने फसवणूक केल्याची तक्रार कृषी खात्याकडे करण्यात आली होती. या नंतर उपविभागीय कृषी अधिकारी वसंत राठोड यांनी जिल्हा कृषी अधीक्षक नरेंद्र नाईक यांच्या मार्गदर्शनात तालुकास्तरीय पथकाला सोबत घेत बांधावर जाऊन पाहणी केली. या वेळी अत्यंत अल्प प्रमाणात कणसात दाणे भरलेले दिसून आले. समितीच डॉ. पंजाबराव देशमुख कृषी विद्यापिठाचे शास्त्रज्ञ डॉ. दिनेश कानवडे, तालुका कृषी अधिकारी रोहीदास मासाळकर व इतर सहभागी होते.

प्रतिक्रिया

बाजरीच्या पिकाबाबत गोंधनखेड येथील शेतकऱ्याची प्रशासनाकडे तक्रार प्राप्त झाल्यानंतर तालुका समितीने भेट देऊन पिकाची पाहणी केली. यात कणसात दाणे भरलेले नसल्याचे समितीला दिसून आले. समितीत माझ्यासह तालुका कृषी अधिकारी, कंपनी प्रतिनिधी, बियाणे विक्रेता, कृषी विद्यापीठाचे तज्ज्ञ व समितीचे सर्व सदस्य, शेतकरी आदी उपस्थित होते. या बाबतचा अहवाल तयार करण्यात आला आहे. या अनुषंगाने कंपनीला निर्देश दिले आहेत. - वसंत राठोड, उपविभागीय कृषी अधिकारी, मेहकर, जि. बुलडाणा