नाशिक जिल्ह्यातील भात लागवड अंतिम टप्प्यात

नाशिक : नाशिक जिल्ह्यात पावसाने गेल्या पंधरा दिवसांपासून भात अवनीच्या कामांना वेग आला आहे. जिल्ह्यात कृषी विभागातर्फे ७० हजार ६३२ हेक्टर क्षेत्र भात लागवडीसाठी निश्चित करण्यात आले होते. मात्र लागवडीचा टक्का वाढला असून, ही लागवड ७१ हजार १४९ हेक्टरवर झाली आहे. सध्या लागवडीची कामे अंतिम टप्प्यात आली आहेत.  जिल्ह्यात प्रामुख्याने इगतपुरी, त्र्यंबकेश्वर, पेठ, सुरगाणा, दिंडोरी व नाशिक तालुक्यात भाताचे उत्पन्न मोठ्या प्रमाणावर घेतले जाते. मात्र, मध्यंतरीच्या काळात मुसळधार पाऊस कोसळत असल्याने भातलागवडीची कामे लांबणीवर पडली होती. त्यामुळे अवनीच्या कामांना फटका बसला होता. उशिरा आलेला मॉन्सून व मुसळधार पाऊस ही त्यामागील प्रमुख कारणे होती. चालू वर्षी इगतपुरी, त्र्यंबकेश्वर, पेठ तालुक्यात प्रस्तावित क्षेत्रापेक्षा लागवड वाढली असून सुरगाणा, दिंडोरी व नाशिक तालुक्यांत क्षेत्र घटले आहे. त्यात पावसामुळे मोठ्या प्रमाणावर नुकसान झाल्याचे चित्र आहे. शेतकऱ्यांनी पाऊस उघडण्याचा अंदाज घेऊन ही कामे अंतिम टप्प्यात आणली आहेत. यामध्ये इंद्रायणी, ओम, सोनम, जानकी, आर २४, एक हजार आठ, राधा फुले आणि मसुरी आदी भाताच्या वाणांची लागवड करण्यात आली आहे. जिल्ह्यात इंद्रायणी भाताचे वाण सर्वाधिक मोठ्या प्रमाणावर घेतले जाते. महाराष्ट्र, गुजरात, मध्य प्रदेश, आंध्र प्रदेश व कर्नाटक राज्यात मागणी चांगली असते. भाताचे कोठार म्हणून ओळखल्या जाणाऱ्या नाशिक जिल्ह्याच्या पश्चिम पट्ट्यात समाधानकारक पावसामुळे  भात लागवडीची कामे अंतिम टप्प्यात आली आहेत. यामध्ये पारंपरिक तसेच सुधारित बियाणे अशा दोन्ही पिकांची शेतकऱ्यांनी लागवड केली आहे. जिल्ह्यात १०० टक्क्यांहून अधिक प्रस्तावित क्षेत्रावर भात पिकाची लावणी पूर्ण झाली असून, सुरवातीला समाधानकारक पाऊस झाल्यामुळे भात उत्पादक शेतकरी सुखावला आहे.