बारामती उपविभागात ४३ हजार हेक्टरवरील पिकांचे नुकसान

पुणे ः मॉन्सूनोत्तर पावसाने बारामती उपविभागातील सुमारे ४३ हजार हेक्टर क्षेत्रावरील पिकांचे नुकसान झाल्याचा अंदाज कृषी विभागाने वर्तविला आहे. विभागातील बारामती, इंदापूर, दौंड, पुरंदर तालुक्यांतील पीक नुकसानीचे पंचनामे पूर्ण झाले असून, नुकसानीचा अंतिम अहवाल उपविभागीय कृषी अधिकारी बालाजी ताटे यांनी शासनाला सादर केला आहे. नुकसानीमध्ये प्रामुख्याने मका, सोयाबीन, द्राक्ष, कांदा, फुले, आणि फळबागांचा समावेश आहे. निकषांनुसार नुकसानभरपाई शेतकऱ्यांच्या बॅंक खात्यावर जमा केली जाणार आहे.  

पावसाचा सर्वाधिक फटका नगदी पिके असलेल्या द्राक्ष, डाळिंब, कांदा, सीताफळ, अंजिरासह भाजीपाला पिके आणि फुल पिकांना बसला आहे. पावसामुळे द्राक्षांची घडकुजीचे प्रमाण वाढले आहे. डाळिंब फुटली असून, काळी पडली आहेत. सीताफळावर काळी बुरशीचे प्रमाण वाढले असून, फळेदेखील मोठ्याप्रमाणावर फुटली आहेत. परिणामी, उत्पादन देखील घटले आहे. फळबागांच्या संगोपनासाठी फवारणीसह अन्य खर्च वाढला आहे. पंचनामे पूर्ण झाल्यानंतर पीक आणि खातेदारनिहाय कर्जाचा तपशील संकलित करण्याचे काम सुरू असून, पीककर्जाची आकडेवारी शासनाला सादर केली जाणार आहे. यानंतर शासकीय निकषांनुसार नुकसानभरपाई शेतकऱ्यांच्या थेट बॅंक खात्यावर जमा केली जाणार आहे.