नियोजनानुसारच होणार चिमणीचे पाडकाम : डॉ.ढाकणे

सोलापूर : सिद्धेश्‍वर कारखान्याच्या चिमणीचे पाडकाम नियोजनानुसारच होईल, असे महापालिकेचे आयुक्त डॉ. अविनाश ढाकणे यांनी सांगितले. या संदर्भात शासनाकडून कोणत्याही प्रकारच्या सूचना किंवा पत्र मिळाले नसल्याचेही त्यांनी स्पष्ट केले. गरज भासल्यास बाहेरून बंदोबस्त मागविला जाईल, असेही ते म्हणाले.

सिद्धेश्‍वर कारखान्याची चिमणी पाडण्यासंदर्भात उच्च न्यायालय आणि राज्य शासनाने दिलेल्या सूचनेनुसार पालिकेने ११ ऑगस्ट रोजी कारवाई सुरू केली. मात्र, त्यावेळी मुख्यमंत्री देवेंद्र फडणवीस यांनी तीन महिन्यांसाठी स्थगिती दिली. त्याची मुदत शनिवारी (ता. ११) संपत आहे. या पार्श्‍वभूमीवर पालिका काय कारवाई करते याबाबत उत्सुकता निर्माण झाली होती.

सध्या शहरात अनधिकृत धार्मिक स्थळे पाडण्याची मोहीम सुरू आहे. त्यासाठी मोठ्या प्रमाणात पोलिस बंदोबस्त लावण्यात आला आहे. परिणामी चिमणी पाडकामाच्या वेळी पुरेसा बंदोबस्त उपलब्ध होणार नाही, अशी चर्चा सुरू झाली होती.

दरम्यान, गाळप सुरू असल्याने चिमणी पाडू नये, असे पत्र कारखाना व्यवस्थापनाने जिल्हाधिकाऱ्यांना दिले आहे. त्याबाबत जिल्हा प्रशासनाने अद्याप काही निर्णय घेतलेला नाही. दरम्यान, चिमणीच्या पाडकामाला मुदतवाढ देण्यासाठी महापौर शोभा बनशेट्टी यांनी काही दिवसांपूर्वी मुख्यमंत्री देवेंद्र फडणवीस यांच्याकडे मागणी केली होती. त्याबाबतही शासनाकडून प्रतिउत्तर आलेले नाही. त्यामुळे पालिकेने पाडकामासाठी तयारी केली आहे.

चिमणीच्या पाडकामासंदर्भात शासनाकडून आम्हाला कोणताही पत्रव्यवहार नाही. या संदर्भात आवश्‍यक तो निर्णय महापालिका आयुक्त घेतील. - डॉ. राजेंद्र भोसले, जिल्हाधिकारी