राज्यात पहिल्याच दिवशी सात केंद्रांवर खरेदी 

नागपूर ः कापूस उत्पादकांची नोंदणी करण्यात आली त्यासोबतच कोरोना प्रतिबंधात्मक उपाययोजनांबाबतही सहकार्य करण्यात आल्याने यवतमाळ चंद्रपूर जिल्हयातील सात केंद्रावर कापूस खरेदीची सुरुवात सोमवार (ता.२०) पासून झाली. महाराष्ट्र राज्य सहकारी कापूस उत्पादक पणन महासंघाची ही केंद्र आहेत. नांदेड जिल्ह्यात दोन ठिकाणी पूर्वीपासूनच सीसीआयची खरेदी सुरु आहे.  राज्यात कापूस उत्पादक शेतकऱ्यांच्या घरात ८० लाख क्‍विंटलपेक्षा अधिक कापूस शिल्लक आहे. त्यामुळे कापसाची खरेदी व्हावी, अशी मागणी होत होती. पणन विभागाकडून याची दखल घेत सोमवार (ता.२०) पासून खरेदी सुरु करण्याचे निर्देश सीसीआय व कापूस पणन महासंघाला दिले होते. राज्यात सुमारे ८५ केंद्रावर सीसीआयकडून तर ७४ केंद्राच्या माध्यमातून पणन महासंघ खरेदी करीत आहेत.  दरम्यान, सोमवारी पणन महासंघाने यवतमाळ जिल्हयात चार तर चंद्रपूर जिल्हयात तीन याप्रमाणे सात केंद्रावर कापूस खरेदी सुरु केली. सीसीआयकडून यवतमाळ, चंद्रपूर, वर्धा, अमरावती, अकोला, बुलडाणा या जिल्ह्यात नोंदणी करण्यात आली आहे. या ठिकाणी दररोज १० गाड्यांमधील कापसाची खरेदी होईल, असे सीसीआयच्या वरिष्ठ अधिकाऱ्यांनी सांगीतले.  राज्यात टप्प्याटप्यात खरेदीस सुरवात  वाशीममध्ये मंगळवार (ता.२१) पासून खरेदी सुरु होण्याची शक्‍यता असल्याचे सीसीआयकडून सांगण्यात आले. नागपूरमधील कापूस खरेदीत काही तांत्रिक अडचणी असून त्या सोडविण्यात आल्यानंतर त्या ठिकाणी देखील लवकरच खरेदी सुरु होईल, अशी माहिती सीसीआयकडून देण्यात आली. राज्यातही टप्याटप्याने खरेदीची सुरुवात होणार आहे. सीसीआयकडून यापूर्वीच नांदेड जिल्हयातील दोन केंद्रावर खरेदी केली जात आहे.