चारशे वर्षात पहिल्यांदाच वारकऱ्यांविना चैत्र वारी 

सोलापूर ः सुमारे ४०० वर्षाची परंपरा असलेल्या चैत्री वारीला शनिवारी (ता.४) कोरोनाच्या संकटामुळे वारकरी पंढरीत येऊ शकले नाहीत. दरवर्षी लाखोच्या संख्येने वारकऱ्यांची असणारी वर्दळ यंदा मात्र झाली नाही. त्यामुळे मंदिर परिसरासह अवघ्या पंढरपुरात शुकशुकाट राहिला. इतिहासात पहिल्यांदाच वारकऱ्यांच्या गर्दीविना ही वारी पार पडली.  चैत्री एकादशीची श्री. विठ्ठल-रुक्मिणीमातेची महापूजा पहाटे मंदिर समितीचे सदस्य आमदार सुजितसिंह ठाकूर यांच्या हस्ते सपत्नीक करण्यात आली. यानिमित्ताने मंदिराच्या गाभाऱ्यात सुमारे ४०० हून अधिक किलो गुलाब फुलांची सजावट करण्यात आली होती. त्यामुळे श्री. विठ्ठल-रुक्मिणीमातेची मूर्ती अधिकच लोभस दिसत होती. पहाटे महापूजा आणि नेहमीप्रमाणे नित्योपचार पार पडले. या वेळी आमदार ठाकूर म्हणाले, संकटाच्या काळात चैत्री वारीतील विठ्ठलाची पुजा मला सर्वांचा प्रतिनिधी म्हणून करण्याचे भाग्य लाभले, देशावर आलेल्या कोरोनाच्या संकटाशी मुकाबला करण्याचे धैर्य आणि बळ देऊन सर्वांची या संकटातून लवकर मुक्तता कर, असे साकडे श्री. विठ्ठलाला घातल्याचे सांगितले.  यावेळी मंदिर समिती सदस्य संभाजी शिंदे, उपविभागीय अधिकारी तथा श्री.विठ्ठल रुक्मिणी मंदिर समितीचे कार्यकारी अधिकारी विठ्ठल जोशी, नायब तहसीलदार तथा व्यवस्थापक बालाजी पुदलवाड, विभाग प्रमुख अमित नवले, श्रीकांत सानप उपस्थित होते. दरम्यान, वारीकाळात एरव्ही मंदिर परिसर आणि अवघ्या पंढरपुरात वारकऱ्यांच्या वर्दळीने रस्ते व्यापून गेलेले असतात, पण यंदा अशी कोणतीही वर्दळ आज पंढरपुरात दिसत नव्हती, असे चित्र पहिल्यांदाच अनुभवायला आले.