तीन कोटी कोरोना योद्ध्यांना मोफत लस

नवी दिल्ली :  देशभरात शुक्रवारपासून (ता. १६) सुरू होणाऱ्या लसीकरण मोहिमेमध्ये तीन कोटी कोरोना योद्ध्यांना मोफत लस दिली जाणार आहे. यासाठीचा सर्व खर्च केंद्र सरकार करणार आहे. पंतप्रधान नरेंद्र मोदींनी सोमवारी (ता.११) सर्व राज्यांच्या मुख्यमंत्र्यांशी झालेल्या चर्चेदरम्यान ही घोषणा केली. या बैठकीदरम्यान लसीकरण मोहिमेच्या तयारीचा आढावा पंतप्रधानांनी घेतला. तसेच लशीसाठी राजकीय नेत्यांनी रांग तोडून पुढे जाऊ नये, असा सल्लाही त्यांनी दिला.

व्हिडिओ कॉन्फरन्सिंगद्वारे झालेल्या या बैठकीत मुख्यमंत्र्यांशी बोलताना पंतप्रधान मोदींनी सांगितले, की सरकारने संमती दिलेल्या कोरोनावरील दोन्ही लशी जगभरातील इतर लशींच्या तुलनेत अधिक किफायतशीर आहेत. दोन्हीही ‘लशी मेड इन इंडिया’ आहेत. या लसीकरणाच्या पहिल्या टप्प्यामध्ये या लशींचा वापर होणार असून ५० हून अधिक वय असलेल्यांना लस देण्याच्या टप्प्यामध्ये आणखी लसींचा पर्याय उपलब्ध होईल असाही दावा पंतप्रधान मोदींनी केला. भारताला लसीसाठी बाहेरच्या देशांवर अवलंबून राहावे लागले असते तर किती त्रास झाला असता याची कल्पना करवत नाही, अशीही टिप्पणी केली.

१६ जानेवारीपासून कोरोना लसीकरणाचा पहिला टप्पा सुरू होत असून यात डॉक्टर, आरोग्य कर्मचारी, स्वयंसेवक आणि कोरोना योद्धे अशा ३ कोटी जणांना लस मिळेल. त्यानंतर ५० वर्षांवरील २७ कोटी नागरिकांना लस देण्याचे नियोजन सरकारने केले आहे. या मोहिमेसाठी आधीच देशभरात दोन वेळा रंगीत तालीम घेण्यात आली आहे. त्याचा संदर्भ देत पंतप्रधान मोदी म्हणाले की लसीकरणामध्ये कोणाला प्राधान्य द्यायचे आहे याबाबत राज्यांशी सल्लामसलत झाली असून पहिल्या टप्प्यात आरोग्य कर्मचारी, स्वच्छता कर्मचारी , पोलिस यासारख्या कोरोना योद्यांना लस दिली जाईल. यासाठीचा सर्व खर्च केंद्र सरकार करणार आहे. याचा आर्थिक भार राज्यांवर पडणार नाही. 

लसीकरण मोहिमेसाठी को-विन अॅप तयार करण्यात आले असून लसीकरणाचा साद्यंत तपशील या अॅपवर उपलब्ध होईल. या अॅपद्वारेच लस मिळेल. ‘आधार’च्या मदतीने लाभार्थ्यांची ओळख पटविली जाईल. पहिला डोस दिल्यानंतर लाभार्थ्याला प्रमाणपत्र मिळेल. येत्या काही महिन्यात ३० कोटी लोकांच्या लसीकरणाचेही नियोजन असल्याचे सांगताना मोदी म्हणाले की लस घेतल्यानंतर दुष्परिणाम जाणवल्यास उपचारासाठी देखील तयारी करण्यात आली आहे. अर्थात, लस आल्यानंतरही कोरोना संक्रमण रोखण्यासाठीचे सर्व निकष पाळावेच लागतील, या इशाऱ्याचा मोदींनी पुनरुच्चार केला. तसेच या मोहिमेत अफवांमुळे अडथळा येऊ नये याची काळजी घेतली जावी, असेही आवाहन केले. या मोहिमेमुळे नियमितपणे सुरू असलेल्या इतर लसींच्या वितरणावर परिणाम होणार नसल्याचेही पंतप्रधानांनी स्पष्ट केले. यासोबतच, बर्ड फ्ल्यूच्या संसर्गाबाबत सावधगिरी बाळगण्याचे आवाहनही पंतप्रधान मोदींनी राज्यांना केले.