कातळावरील गोड्या पाण्यातील मत्स्यशेतीचा प्रयोग यशस्वी

सिंधुदुर्ग : जिल्ह्यातील कांदळगाव (ता. मालवण) येथे कातळावरील गोड्या पाण्यातील मत्स्यशेतीचा प्रयोग यशस्वी झाला आहे. अशा पद्धतीचा हा पहिलाच प्रयोग असून भूषण सुर्वे यांच्या दीड एकर क्षेत्रावर प्रायोगिक तत्त्वावर हा प्रकल्प करण्यात आला होता. डॉ. बाळासाहेब सांवत कोकण कृषी विद्यापीठ दापोली, मत्स्यसंशोधन केंद्र मुळदे, नीलक्रांती मत्स्य पर्यटन सहकारी संस्था यांच्या संयुक्त विद्यमाने मालवण तालुक्यातील कांदळगाव येथील भूषण सुर्वे यांच्या मालकीच्या जमिनीत कातळावरील प्रायोगिक तत्त्वावर गोड्या पाण्यातील मत्स्यपालन प्रकल्प राबविला होता. कातळावर पावसाचे पाणी साठवून त्यामध्ये मुळदे संशोधन केंद्रात तयार केलेले कटला, रोहू जातीचे ३० हजार बीज ऑगस्ट, सप्टेंबर २०१९ मध्ये सोडण्यात आले होते.  सप्टेंबर ते जानेवारी या कालावधीत तलावात सोडलेल्या माशांची किती वाढ झाली याची मुळदे येथील शास्त्रज्ञांनी माशांची पाहणी केली. या तपासणीत माशांची वाढ अतिशय चांगली झाल्याचे दिसून आले. या तलावातून सुमारे १० हजार मासे तयार होतील अशी अपेक्षा आहे. त्यापैकी पहिल्या टप्प्यात १ हजार ७५० माशांची काढणी करून ते धामापूर धरणात सोडण्यात आले. काढणी केलेल्या माशांचे वजन १०० ग्रॅम झाले आहे. या तलावात सोडण्यात आलेल्या मत्स्यबीजापैकी ४ ते ५ हजार नग वाहून गेले आहेत. हा प्रयोग यशस्वी झाल्यामुळे जिल्ह्यातील गोड्या पाण्यातील मत्स्यपालन व्यवसायाला गती मिळणार आहे.