तासगावातील पाच तलाव भरले

सांगली : तासगाव तालुक्यात दरवर्षी पाणी टंचाईला सामोरे जावे लागते. मात्र, यावर्षी मॉन्सूनसह अवकाळी पावसाच्या दमदार हजेरीमुळे तासगाव तालुक्यातील सात तलावापैकी पाच तलाव पूर्ण क्षमतेने भरले आहेत. उर्वरित तलावात पाणीसाठा होत आहे. त्यामुळे तालुक्यातील पाणीसाठा ९५ टक्क्यांवर पोहोचला आहे. गतवर्षी सप्टेंबरच्या दुसऱ्या आठवड्यात १४ टक्के पाणीसाठा होता. यंदा ८० टक्के पाणीसाठा वाढला आहे. त्यामुळे शेतकऱ्यांना मोठा दिलासा मिळाला.  

तासगावची दुष्काळी तालुका अशी ओळख आहे. तालुक्याचा पूर्व भाग दुष्काळाच्या झळांनी होरपळून निघत होता. उन्हाळ्यात पाण्याअभावी, विहिरी, नद्या, बंधारे, तलाव कोरड्या पडलेल्या असायच्या. या भागात ताकरी आणि आरफळ योजनांचे पाणी फिरले आहे. त्यामुळे पाणी टंचाई दूर होण्यास मदत झाली. परंतु, अवेळी सुरु होणाऱ्या योजनांमुळे शेतकऱ्यांना वेळेत पाणी मिळत नाही. 

तासगाव तालुक्यासह पूर्व भागाच्या दुष्काळी पट्ट्यात यंदा पाणी टंचाईच्या झळा फारशा बसल्या नाहीत. पुरेसा पणीसाठा असल्याने शेतकऱ्यांना ऐन उन्हाळ्यात द्राक्ष शेतीला टॅंकरचा आधार घ्यावा लागला नाही. गेल्यावर्षी चांगला पाऊस झाला. त्यामुळे तलाव, विहीरी, भरल्या होत्या. दरम्यान, ताकारी योजनेच्या चार आवर्तना द्वारे या भागात पाणी फिरले. त्यामुळे तालुक्यात पाणी टंचाई भासली नाही.

चालुवर्षी मॉन्सून व अवकाळीचा तासगाव तालुक्यात दमदार पाऊस झाला. तालक्यातील सर्वात मोठा तलाव सिध्देवाडी असून पाणीसाठवण क्षमता ३०२.९५ दश लक्ष घनफुट आहे. पेड, मोराळे, पुणदी, लोढे, हे तलावही शंभर टक्के भरले आहेत. अंजनी तलाव सध्या ९७ टक्के आहे. 

तालुक्यातील पाणीसाठा, क्षमता (दशलक्ष घन फूट)