खानदेशातील पाच साखर कारखाने सुरू

जळगाव : खानदेशात पाच साखर कारखान्यांमध्ये गाळप सुरू झाले असून, गाळपात पुरुषोत्तमनगर (ता. शहादा, जि. नंदुरबार) येथील सातपुडा सहकारी साखर कारखान्याने आघाडी घेतली आहे. त्यापाठोपाठ समशेरपूर (ता. नंदुरबार) येथील एस्टीरिया शुगर ली. यांच्याकडूनही गतीने गाळप सुरू आहे. जळगाव जिल्ह्यातील चोपडा व यावल येथील सहकारी साखर कारखाने सुरू होण्याची शेतकऱ्यांना प्रतीक्षा आहे.

खानदेशात मिळून सुमारे ६० हजार मेट्रिक टन उसाचे गाळप झाल्याचा अंदाज आहे. जळगाव जिल्ह्यात दोन खासगी कारखाने सुरू झाले आहेत. त्यात मुक्ताईनगर येथील मुक्ताई व बेलगंगा (ता. चाळीसगाव) येथील अंबाजी शुगर हे कारखाने सुरू आहेत. अंबाजीकडून जळगाव जिल्ह्यात सर्वाधिक दीड ते दोन लाख मेट्रिक टन उसाचे गाळप होईल, असे सांगितले जात आहे.

हा कारखाना जुन्या बेलगंगा सहकारी साखर कारखान्यात सुरू झाला असून, तो चाळीसगावमधील प्रगतिशील शेतकरी, उद्योजकांनी खरेदी करून यंदा सुरू केला. १० वर्षे बंदावस्थेतील हा कारखाना सुरू झाल्याने उसाखालील क्षेत्र वाढून शेतकऱ्यांना त्याचा लाभ होईल. जळगाव जिल्ह्यात न्हावी (ता.यावल) येथील मधुकर सहकारी साखर कारखाना व चहार्डी (ता. चोपडा) येथील चोपडा सहकारी कारखाना अजूनही सुरू झालेला नाही. मधुकर यंदा सुमारे एक ते दीड लाख मेट्रिक टन उसाचे गाळप करील, असा अंदाज आहे.

चोपडा येथील कारखान्याकडे ऊस उत्पादकांचे पैसे थकले आहेत. या संदर्भातील वाद साखर आयुक्त व जिल्हा प्रशासनाकडे पोचला असून, ऊस उत्पादकांनी कारखान्यातील साखर व इतर बाबी विक्री करून पैसे देण्याची मागणी केली आहे.

धुळे जिल्ह्यात कुठलाही कारखाना सुरू नाही. दोन कारखाने या जिल्ह्यात असून, ते बंदावस्थेत आहेत. शिरपूर येथील कारखाना सुरू करण्याची मागणी शेतकरी संघटनेने मागील वर्षी केली होती. नंदुरबार जिल्ह्यातील डोकारे (ता. नवापूर) येथील आदिवासी सहकारी साखर कारखाना सुमारे अडीच ते तीन लाख मेट्रिक टन उसाचे गाळ करील, असे सांगितले जात आहे.