वीजबिलातील स्थिर आकार तीन महिन्यांसाठी स्थगित ः ऊर्जामंत्री राऊत

नाशिक : ‘कोरोना’च्या प्रादुर्भावामुळे राज्यात ३० एप्रिलपर्यंत लॉकडाऊन घोषित करण्यात आला आहे. त्यामुळे राज्यातील बहुतेक सर्वच मोठे उद्योग आणि वाणिज्यिक ग्राहकांनी आपला व्यवसाय बंद केला आहे. बंद असलेल्या औद्योगिक आणि वाणिज्यिक ग्राहकांच्या वीजबिलातील स्थिर आकार, मागणी आकार पुढील ३ महिन्यांसाठी स्थगित करण्यात येत आहे. त्यानंतर येणाऱ्या बिलात कोणताही दंड न आकारता तो समाविष्ट करण्यात येईल,’’ अशी माहिती ऊर्जामंत्री डॉ. नितीन राऊत यांनी दिली. 

‘लॉकडाऊन’च्या कालावधीतील वीजबिलातील स्थिर आकार, मागणी आकार माफ करावा, अशी मागणी औद्योगिक, वाणिज्यिक ग्राहकांनी केली होती. ही मागणी ग्राह्य धरून ऊर्जामंत्र्यांनी  दिलासा दिला आहे. ‘एएमआर’मार्फत ज्या ग्राहकांचे मीटर वाचन उपलब्ध आहे, अशा ग्राहकांना त्यांच्या मीटरवरील नोंदीनुसार वास्तविक बील देण्यात येईल. जर ग्राहकांचे मीटर रीडिंग उपलब्ध नसेल, तर त्या ग्राहकांना सरासरी वीजबिल आकारण्यात येईल. मे-२०२० मध्ये ‘एएमआर’मार्फत बिलाची माहिती उपलब्ध झाल्यानंतर वास्तविक मीटर रीडिंगनुसार वीजबिल आकारण्यात येईल, असे डॉ. राऊत यांनी सांगितले. 

डॉ. राऊत म्हणाले, ‘‘लॉकडाऊनच्या कालावधीत कुठल्याही प्रकारचा वीजवापर झाला नसल्याचे समजून या दरम्याचे शून्य वापराचे वीजबिल देण्यात येईल. अशा ग्राहकांचे मीटर रीडिंग मिळाल्यानंतर त्यांना लॉकडाऊनच्या कालावधीत नोंदविलेल्या वास्तविक वापराचे वीजबिल देण्यात येईल.

महाराष्ट्र वीज नियामक आयोगाने जारी केलेल्या मार्गदर्शक सूचनांनुसार मीटर वाचन होणार नाही. बिलिंग सरासरी मासिक वापरावर राहील. ग्राहकांना वेबसाईट किंवा मोबाईल अॅपद्वारे सेल्फ रीडिंग (स्वत: घेतलेले) घेऊन वीजबिल भरता येईल. ज्या ग्राहकांनी स्वत:हून मीटर रीडिंग सादर केले, त्यांना सरासरीनुसार वीज आकारणी केली जाईल. पुढील काळात ज्यावेळी मीटर रीडिंग घेतले जाईल, त्यावेळी ग्राहकांना त्या महिन्यांचे सरासरी बिल आकारले जाईल, असेही डॉ. राऊत यांनी सांगितले.

वीज बिल भरण्यास सवलत  तात्काळ वीजबिल भरणा, गो-ग्रीन सवलत, डीजिटल पेमेंटबाबतच्या सवलती ग्राहकांना नियमाप्रमाणे लागू आहेत. मार्च महिन्याचे बिल भरण्यास १५ मेपर्यंत सवलत देण्यात आली आहे. तर, एप्रिल-२०२० चे वीजबिल भरण्यासाठी ३१ मे अंतिम तारीख दिली आहे. ग्राहकांनी आपले वीजबिल वेळेवर भरून महावितरणला सहकार्य करावे, असे आवाहनही डॉ. राऊत यांनी केले.