सोलापूर जिल्ह्यातील पूर ओसरला, परिस्थितीत सुधारणा

सोलापूर : गेल्या दोन दिवसांपासून उजनी धरणातून भीमा नदीत पाण्याचा विसर्ग कमी-जास्त करण्यात येत होता. मंगळवारी (ता. १३) भीमा नदीतून पाच हजार क्युसेक विसर्ग होता. बुधवारी (ता. १४) त्यात पुन्हा वीस हजार क्युसेकपर्यंत वाढ करण्यात आली. तसेच वीर धरणातून नीरा नदीत सोडण्यात येणारा विसर्ग पूर्णपणे बंद करण्यात आला. त्यामुळे सध्या उजनी धरणातून भीमा नदीत फक्त २० हजार क्युसेक एवढाच विसर्ग आहे. 

दौंड कडू उजनी धरणामध्ये १८ हजार ५२० एवढा पाण्याचा विसर्ग सुरू आहे. त्यामुळे धरणात येणारे पाणी आणि धरणातून पुढे जाणारे पाणी याचा विसर्ग केवळ वीस हजार क्युसेक असल्याने पूरपरिस्थिती सध्या नियंत्रणात आहे. उजनीची पाणी पातळी ही १०६ टक्क्यांवर स्थिर  आहे.

सांगवी येथील दोघांचा भीमा नदीच्या पुरात बुडून मृत्यू उजनी धरणातून भीमा नदीत सोडलेल्या पाण्यामुळे सांगवी (ता. पंढरपूर) येथील हनुमंत गलांडे (वय ५०) व धुळा गलांडे (वय ५५) ह्या दोघांचा भीमा नदीच्या पुरात बुडून मृत्यू झाला. ही घटना रविवारी (ता. ११) घडली. मंगळवारी (ता. १३) तिसऱ्या दिवशी दोघांचेही मृतदेह बाहेर काढून करकंब येथील ग्रामीण रुग्णालयात उत्तरीय तपासणीनंतर कुटुंबीयांच्या ताब्यात देण्यात आले. याबाबत करकंब पोलिस ठाण्यात अकस्मात मृत्यू म्हणून नोंद झाली आहे.

भीमा नदीच्या पुराचे पाणी सांगवी येथील ओढ्यात मागे सरले होते. रविवारी धुळा गलांडे व हनुमंत गलांडे हे एकादशीसाठी पंढरपूरला निघाले होते. दोघांनीही अंगातील कपडे काढून डोक्याला बांधून ओढा पार करण्याचा प्रयत्न केला. पण ओढ्यावरील पाण्याचा अंदाज न आल्याने दोघांचाही बुडून मृत्यू झाला. हे दोघेही प्रत्येक एकादशीस पंढरपूरला जात होते. पण यंदा काळाने त्यांच्यावर झडप घातली. सहायक पोलिस निरक्षक प्रशांत पाटील यांच्या मार्गदर्शनाखाली हेडकॉन्स्टेबल दादासाहेब सुळ व संतोष पाटेकर तपास करीत आहेत.