सांगलीत पूर ओसरला; गावांत अजूनही पाणी

सांगली : पूर ओसरलाय...गाव सोडलेली लोकं पुन्हा गावाकडं जाऊ लागली आहेत. गावात पोचल्यानंतर झालेलं नुकसान बघून आता संसाराचा गाडा कसा उभा करायचा, असा प्रश्न प्रत्येकाच्या डोळ्यांसमोर निर्माण झाला आहे. सांगली जिल्ह्यातील सांगली महापालिकेसह १०७ गावांमधील सुमारे ७५ हजार कुटुंबांना महापुराने फटका दिला आहे. साडेतीन लाखांहून अधिक नागरिकांना महापुराने उद्‌ध्वस्त केले आहे. सांगली शहरातील आयर्विन पुलाजवळ पाण्याची पातळी ४१ फुटापर्यंत पोचली असून धोका पातळीच्या खाली गेली आहे. सांगली शहरासह जिल्ह्यातील वाळवा, मिरज, शिराळा, पलूस या तालुक्यातील पूर ओसरला आहे. नागरिक गावाकडं जाऊ लागले आहेत. राज्यातून जिल्ह्यातील पूरग्रस्त गावांना मदतीचा ओघ मोठ्या प्रमाणात सुरू झाला आहे. त्यामुळे काही प्रमाणात दिलासा मिळाला असला तरी संसार उभा करणे मोठे आव्हानात्मक आहे. जिल्ह्यात दुपारपर्यंत सुमारे ६ कोटी रुपयांचे वाटप झाले आहे.  पलूस तालुक्यातील ब्रह्मनाळ, खटाव, माळवाडी, भिलवडी, सुखवडी, चोपडेवाडी या गावांत अजून पाणी आहे. हे पाणी कमी होण्यास अजून पाच ते सहा दिवस जाणार आहे. त्यानंतर या गावातील स्थिती विदारक असणार आहे. ज्या गावातील पाणी कमी झाले आहे, त्या गावात लोक जाऊ लागले आहेत. गावात जाताच शेतीचं झालेलं नुकसान, पडलेली घरं, दावणीची जनावरं पुराच्या पण्यातून वाहून गेलेली हे सारं पाहताच लोकांच्या डोळ्यातून पाणी आलं. आता घर पुन्हा कसं उभा करायचं, यासाठी पैसे कुठून आणायचे असा प्रश्न आवासून समोर उभा होता.