पुणे जिल्ह्यातील धरणांतून विसर्ग वाढला; नद्यांना पूर

पुणे  : पुणे जिल्ह्यातील धरणांच्या पाणलोट क्षेत्रात मंगळवारी (ता. ३) रात्रभर जोरदार पावसाने हजेरी लावली. जिल्ह्यातील सर्व धरणे भरली असल्याने पावसाचा जोर वाढताच धरणातून पाणी सोडावे लागत आहे. बुधवारी सकाळी खडकवासला, मुळशी, पवना, वीर धरणांतून पाण्याचा विसर्ग वाढल्याने मुळा, मुठा, पवना, नीरा, भीमा, इंद्रायणी, भामा या नद्यांना पूर आला आहे. उजनी धरणही शंभर टक्के भरल्याने या धरणातून विसर्ग करावा लागणार आहे. 

मंगळवारी दुपारपासून धरण क्षेत्रात मध्यम पावसाला सुरवात झाल्यानंतर रात्रभर जोर वाढला होता. बुधवारी (ता. ७) सकाळी आठ वाजेपर्यंतच्या २४ तासांत टेमघर धरणक्षेत्रात ८३, वरसगाव ७०, पानशेत ७१, खडकवासला १९, पवना १०६, कासारसाई ४०, मुळशी ९९, कळमोडी ५, भामा आसखेड ३१, आंद्रा ५८, वडीवळे ९६, गुंजवणी ४७, नीरा देवघर ४४, भाटघर धरण क्षेत्रात १६ मिलिमीटर पावसाची नोंद झाली.  

पाणलोट क्षेत्रातून पाण्याची आवक वाढल्याने धरणांतून पाणी सोडावे लागत आहे. बुधवारी (ता. ४) दुपारी १२ वाजता खडकवासला धरणातून ३१ हजार ४४९ क्युसेक, मुळशी धरणातून २५ हजार २१४ क्युसेक, वीर धरणातून २३ हजार १८५, वरसगाव १२ हजार ४३५, पवना १२ हजार ६००, पानेशत ७ हजार ४१९, गुंजवणी २ हजार ५३७, नीरा देवघर ७ हजार ९३८, भाटघर ७ हजार ८२०, माणिकडोह १ हजार ५०, भामा असखेड १ हजार ६५३, वडीवळे ४ हजार ४०४, आंद्रा १ हजार ४००, कासारसाई ७००, टेमघर ६०४ क्युसेक वेगाने पाण्याचा विसर्ग करण्यात येत असल्याचे पुणे पाटबंधारे विभागातर्फे सांगण्यात आले.