नुकसानग्रस्तांना शासकीय निकषांनुसार मदत देऊ : चंद्रकांत पाटील

पुणे  : पुणे जिल्ह्यात झालेल्या अतिवृष्टीमुळे नद्यांना पूर आला आहे. त्यामुळे बहुतांश धरणांतून विसर्ग सुरू आहे. नुकसान झालेल्या भागात पंचनामे करून अहवाल सादर करा, नुकसानग्रस्तांना शासनाच्या निकषांप्रमाणे मदत केली जाईल. आपत्तीच्या काळात जिल्ह्यातील सर्व यंत्रणांनी समन्वय ठेवत सतर्क राहावे, असे निर्देश महसूलमंत्री चंद्रकांत पाटील यांनी दिले.

अतिवृष्टीमुळे निर्माण झालेल्या स्थितीची पाहणी करण्यासाठी पालकमंत्री श्री. पाटील पुणे जिल्ह्याच्या दौ-यावर आले होते. बालेवाडी येथील श्री शिवछत्रपती क्रिडा संकुल सभागृहात पूरस्थितीचा त्यांनी आढावा घेतला. त्या वेळी ते बोलत होते. या वेळी संजय भेगडे, महापौर मुक्ता टिळक, पिंपरी चिंचवडचे महापौर राहुल जाधव, आमदार बाबुराव पाचर्णे, राहुल कुल, योगेश टिळेकर, लक्ष्मण जगताप, महेश लांडगे, विभागीय आयुक्त डॉ. दीपक म्हैसेकर, जिल्हाधिकारी नवल किशोर राम, पुणे मनपा आयुक्त सौरभ राव, पिंपरी चिंचवड आयुक्त श्रावण हर्डीकर, जिल्हा पोलिस अधिक्षक संदीप पाटील यांच्यासह सबंधित विभागाचे अधिकारी उपस्थित होते.

पालकमंत्री पाटील म्हणाले, की पुणे जिल्ह्यातील बहुतांश धरणे भरली आहेत. धरणक्षेत्रांत पाऊस सुरूच आहे, आणखी दोन दिवस सतर्कतेचा इशारा देण्यात आला आहे. त्यामुळे या कालावधीत धरणांचे सनियंत्रण करावे. आरोग्य विभागाने दक्ष राहावे, आवश्यक त्या लसींसह औषधांचा पुरेसा साठा ठेवावा, गरजेप्रमाणे औषधांची मागणी तातडीने नोंदवावी. सार्वजनिक बांधकाम विभागाने रस्त्यांची तातडीने दुरुस्ती करावी. तसेच पुलांचे स्ट्रक्चरल ऑडिट करून त्यासंबंधीचा अहवाल सादर करावा. असुरक्षित रस्ते, पूल बंद करावेत. कोणतीही दुर्घटना होणार नाही, याबाबतची काळजी घ्यावी.

जिल्हाधिकारी श्री. राम म्हणाले, पुणे जिल्ह्यात ९१७.४८ मिलिमीटर पाऊस झाला आहे. बारामती, इंदापूर, दौंड व पुरंदर वगळता उर्वरित सर्वच तालुक्यांत अतिवृष्टी झाली आहे. पुणे व पिंपरी चिंचवड शहरातून तीन मोठ्या नद्या वाहत आहेत, त्यामुळे योग्य दक्षता घेतली जात आहे. पूरस्थितीमुळे आतापर्यंत तीन हजार ३४३ कुटुंबांना स्थलांतरित करण्यात आले असून यामध्ये १३ हजार ३३६ नागरिकांचा समावेश आहे.