सातारा जिल्ह्यात चारा छावण्यांची संख्या घटली

संग्रहित छायाचित्र
संग्रहित छायाचित्र

सातारा : जिल्ह्यातील माण, खटाव, फलटण या तालुक्यांना मुसळधार पाऊस फायदेशीर ठरू लागला आहे. पावसामुळे सर्व टॅंकर बंद झाले असून, चारा छावण्यांच्या संख्येतही घट झाली आहे. माण, फलटण या दोन तालुक्यांत शुक्रवारअखेर ७२ चारा छावण्या सुरू असून, यामध्ये ३० हजार जनावरे दाखल आहेत. शेतकरी जनावरे घरी घेऊन जाऊ लागल्याने पुढील दोन दिवसांत छावण्या बंद कराव्या लागण्याची शक्यता व्यक्त होत आहे. 

खरीप हंगाम सुरू झाला तरी दुष्काळग्रस्त तालुक्यांत पाऊस न झाल्याने येथील नागरिकांना पाण्यासाठी टॅंकरवर अवलंबून राहवे लागत होते. चाराटंचाईमुळे जनावरांना चारा छावण्यांमध्ये दाखल करावे लागले होते. जिल्ह्यात प्रशासनाने आॅगस्ट महिन्यात ११० चारा छावण्या सुरू केल्या होत्या. यामध्ये ५२ हजारांवर जनावरे दाखल होती. मागील आठ दिवसांपर्यंत वरील तीन तालुक्यांत हीच स्थिती होती. मात्र गेल्या चार दिवसांत झालेल्या पावसामुळे दुष्काळग्रस्त भागाला दिलासा दिला आहे.

माण, खटाव, फलटण या दुष्काळग्रस्त तालुक्यांमधील बहुतांशी भागात मुसळधार पावसाने हजेरी लावल्याने या तालुक्याचे चित्र पालटले आहे. पिण्याच्या पाण्याचा प्रश्‍न सुटला असल्याने प्रशासनाने सर्व टँकर बंद केले आहे. तसेच चारा छावण्याची संख्या घटली आहे. खटाव तालुक्यातील चारा छावण्या बंद करण्यात आल्या आहेत.  माण तालुक्यात ७० व फलटण तालुक्यात दोन अशा एकूण ७२ चारा छावण्या सध्या सुरू असून, यामध्ये ३० हजार जनावरे दाखल आहे. हा जनावरांचा आकडाही पुढील दोन दिवसांत कमी होणार असल्याचे सांगितले जात आहे. कदाचित ३० सप्टेंबरपर्यंत चारा छावण्या बंद होण्याची शक्यता आहे.

माण तालुक्‍यातील उत्तर भागातील  छावणीचालक संघटनेचे अध्यक्ष चंद्रकांत जगदाळे यांच्यासह दादासाहेब शिंदे, विठ्ठलराव भोसले, अमोल निंबाळकर, रफिक मुलाणी, गोरख शिर्के, विठ्ठलराव जगदाळे यांनी चारा छावण्या बंद कराव्यात यासाठी शुक्रवारी माणच्या तहसीलदारांना दिले आहे. वेळेवर पाऊस पडल्यामुळे छावणीचालकांनी छावण्या बंद करण्याचा निर्णय घेतला असल्याचे पत्रात नमूद केले आहे. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com