पुणे : यंदा जिल्ह्यात उशिराने पाऊस झाला. त्यातच पावसाचा मुक्कम दीर्घकाळ लांबला. या जोरदार पावसामुळे चारापिकांचे मोठे नुकसान झाले आहे. त्यामुळे अनेक भागांत सध्या चाराटंचाई भेडसावत आहे. जनावरांसाठी चारा उपलब्ध व्हावा, म्हणून जिल्ह्यातील बहुतांशी भागांत शेतकऱ्यांची चारा जमा करण्यासाठी धावपळ सुरू असल्याचे दिसून येते.
यंदा पावसाने काही ठिकाणी मका, बाजरीचा चारा खूपच खराब झाला. जिल्ह्यातील मावळ, मुळशी, भोर, वेल्हा, जुन्नर, आंबेगाव, खेड, शिरूर, पुरंदर, बारामती, दौंड, इंदापूर, हवेली तालुक्यांत जोरदार पाऊस झाला. जिल्ह्यातील अनेक भागांत जवळपास एक ते दीड महिना सातत्याने पाऊस होता. त्यामुळे मका, बाजरी यांसह काही पिकांचे काढणीदरम्यान मोठे नुकसान झाले. मात्र, गेल्या पंधरा ते वीस दिवसांपासून पाऊस उघडल्याने मका, भात, बाजरी काढण्यात शेतकरी व्यक्त आहेत.
काही ठिकाणी चाऱ्याच्या पेंढ्या शेतातच जमा करण्याचे तर काही ठिकाणी गंजी लावण्याची कामे सुरू आहेत. सध्या हिरवे गवत उपलब्ध असले, तरी ते एक ते दीड महिना पुरेल. मात्र, पुढील काही महिन्यांचा चाऱ्याचा प्रश्न गंभीर होऊ नये, म्हणून अनेक शेतकरी आत्तापासूनच तजवीज करून ठेवत आहेत. अनेक शेतकरी मका, बाजरीचा चारा विकताना दिसत आहेत.
जोरदार पावसामुळे जिल्ह्यातील अनेक भागांत खरीप हातचा गेला आहे. आता रब्बी हंगामात किमान काहीतरी पदरी पडेल या आशेवर शेतकरी पुन्हा जोमाने कामाला लागले आहेत. नुकसान झालेली पिके काढून रब्बी ज्वारी पेरणीकडे शेतकऱ्यांचा कल दिसून येतो. त्यामुळे किमान जनावरांना चारा तरी उपलब्ध होईल, अशी शेतकऱ्यांना अपेक्षा आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.