राज्यांना ६५ लाख टन धान्याचे वितरण 

नवी दिल्ली: देशात लॉकडाऊन झाल्यानंतर २५ मार्चपासून आतापर्यंत भारतीय अन्न महामंडळाने ६५ लाख ४४ हजार टन धान्याचे वितरण केले आहे. देशभरात २ हजार ३३७ रेल्वे रेक्सच्या माध्यमातून हे धान्य पाठविले गेले. धान्याचे पंतप्रधान गरिब कल्याण अन्न योजनेतून वाटप करण्यात आले, अशी माहिती केंद्रीय अन्नमंत्री रामविलास पासवान यांनी ट्विटद्वारे दिली.  ‘‘भारतीय अन्न महामंडळाने २५ मार्च ते २ मे या कालावधीदरम्यान वेगवेगळ्या राज्यांत ६५ लाख ४४ हजार टन धान्याचे २ हजार ३३७ रेल्वे रेकच्या माध्यमातून वितरण केले आहे. यामध्ये ६२.३७ लाख टन तांदूळ आणि भाताच्या समावेश आहे. पंतप्रधान गरिब कल्याण अन्न योजनेतून गरिबांना या धान्याचे वाटप करण्यात येणार आहे,’’ अशी माहिती मंत्री पासवान यांनी दिली.  अर्थमंत्री निर्मला सितारामन यांनी कोरोना संकटाच्या पार्श्‍वभुमीवर समाजातील दुर्बल घटकांना दिलासा देण्यासाठी १.७ लाख कोटी रुपयांचे पॅकेज जाहिर केले होते. या पॅकेजअंतर्गत ही योजना राबविली जात आहे. राष्ट्रीय अन्नसुरक्षा योजनेतून देशातील ८ कोटी १४ लाख लोकांना एप्रिल ते जून या कालावधीत सरकार ५ किलो मोफत धान्य देणार आहे.तसेत त्यांना प्रत्येक महिन्याला सवलतीच्या दरात ५ किलो तांदूळ किंवा गहू देण्यात येणार आहे. तसेच प्रत्येक कुटुंबाला महिन्यासाठी एक किलो डाळ देण्यात येणार आहे.  भारतीय अन्न महामंडळाने एप्रिल महिन्यात ६० लाख टन धान्याचे राज्यांना वितरण केले आहे. हा आकडा सामान्य परिस्थितीत वितरित होणाऱ्या धान्यापेक्षा दुप्पट आहे. तसेच केंद्र सरकारने राज्ये आणि खासगी संस्थांसाठी तांदूळ आणि गव्हाच्या लिलावाच्या मुळ किंमती कमी केल्या आहेत. सरकारने गव्हाची मुळ किंमत २१.३५ रुपये किलोवरून २१ रुपये केली आहे. तर भाताची किंमत २२.५० रुपयांवरून २२ रुपये केली आहे.