जगावर अन्न अरिष्टाचे सावट : संयुक्त राष्ट्रसंघाचा इशारा

न्यूयॉर्क ः कोरोना महामारीच्या संकटातही जगात आजघडीला पुरेसे अन्नधान्य उपलब्ध आहे, परंतु गरजू देश आणि लोकांपर्यंत त्याचे वितरण करण्याचा मुद्दा गंभीर आहे. आंतरराष्ट्रीय सहकार्य, खुला बाजार आणि पुरवठा साखळी याकडे दुर्लक्ष केल्यास आरोग्य अरिष्टाचे रूपांतर अन्न अरिष्टात होईल, अशा इशारा संयुक्त राष्ट्रसंघाच्या अन्न आणि शेती संघटनेने (एफएओ) दिला आहे.

कोरोनामुळे जागतिक पातळीवर अन्नाच्या मागणी-पुरवठ्याचे बदललेले चित्र, किमतींचा कल आणि अर्थव्यवस्थेवरील परिणाम या संदर्भात ‘एफएओ'ने नुकताच एक अहवाल जाहीर केला आहे. तांदळासारख्या काही शेतीमालाच्या किंमतीत सध्या तात्पुरती वाढ दिसत असली तरी एकूण मागणीत होणारी घट आणि अर्थकारणाला बसलेला फटका यामुळे पुढील काही महिन्यांमध्ये सर्वच प्रमुख शेतीमालांच्या किंमती उतरणीला लागण्याची शक्यता आहे. शेतकरी आणि शेती क्षेत्रासाठी ती धोक्याची घंटा ठरेल, असे या अहवालात म्हटले आहे. अन्नअरिष्ट टाळण्यासाठी एफएओच्या शिफारसी

आफ्रिका खंडाला मोठा फटका शक्य कोरोनाचे संकट येण्यापूर्वीच म्हणजे २०१९ मध्येच जगातील सुमारे १३५ दशलक्ष लोकांना अन्न सुरक्षेच्या तीव्र संकटाला सामोरे जावे लागत होते. कोरोनासारख्या महामारीमुळे आणखी १८३ दशलक्ष लोकांना याचा फटका बसण्याची शक्यता आहे. आफ्रिका खंडातील देशांना सर्वाधिक झळ बसणार आहे, असे निरीक्षण ‘ग्लोबल नेटवर्क अगेन्स्ट फूड क्रायसिस'ने नोंदवले आहे. या पार्श्वभूमीवर शेती आणि ग्रामीण जनजीवन संरक्षित करण्याची आवश्यकता असल्याचे ग्लोबल नेटवर्कने म्हटले आहे.