नागपूर : सन २०१४च्या विधानसभा निवडणुकीच्या वेळी प्रतिज्ञापत्रात दोन फौजदारी गुन्ह्यांची माहिती लपविल्याने राज्याचे माजी मुख्यमंत्री देवेंद्र फडणवीस यांच्यावर फौजदारी कारवाई करण्यात यावी, अशी विनंती करणारा अर्ज अॅड. सतीश उके यांनी न्यायालयात दाखल केला होता. त्यावर गुरुवारी (ता. २०) सुनावणी करताना १५ हजार रुपयांच्या वैयक्तिक जातमुचलक्‍यावर फडणवीस यांना न्यायालयाने जामीन मंजूर केला.
फडणवीस यांना न्यायालयाने आज न्यायालयात उपस्थित राहण्याची शेवटची संधी दिली होती. त्यानुसार ते हजर झाले. या वेळी फडणवीस पत्रकारांशी बोलताना म्हणाले, ‘‘जनतेसाठी केलेल्या आंदोलनांमुळे आपल्यावर काही गुन्हे दाखल झाले होते. लोकांसाठी संघर्ष करताना दाखल झालेली सर्व प्रकरणे आहेत. २०१४ च्या आणि यावेळच्या निवडणुकीतही ५० टक्‍क्‍यांपेक्षा जास्त मते मी घेतली आहेत आणि या निवडणुकांमध्ये प्रक्रियेवर परिणाम करतील, असे कुठलेही गुन्हे मी लपविलेले नाहीत. ज्या गुन्ह्यांसाठी न्यायालयात प्रकरण दाखल करण्यात आले, ती १९९३ ते १९९८ दरम्यानची आहेत. आंदोलना दरम्यानचीच आहेत. दोन खासगी प्रकरणे दाखल करण्यात आली होती आणि ती निकालीही निघाली होती. या दाखल प्रकरणी सर्व माहिती न्यायालयाला देऊ,’’
न्यायपालिकेवर माझा पूर्ण विश्‍वास आहे, असे सांगताना यामागे कोण आहे, याचीही आपल्याला कल्पना असल्याचे ते म्हणाले. प्रकरण न्यायप्रविष्ट असल्याने त्यावर जास्त बोलणे योग्य नाही, असेही ते म्हणाले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.