शेतकरी कंपन्यांचाही ‘ई-नाम’मध्ये समावेश 

नवी दिल्ली: केंद्रीय कृषीमंत्री नरेंद्रसिंह तोमर यांनी ‘ई-नाम’मध्ये दोन नविन फिचर्स् चा समावेश केला आहे. यामध्ये शेतकरी उत्पादक कंपन्यांच्या खरेदी केंद्रावरून कंपन्यांना ऑनलाइन व्यवहार करता येणार आहे. कोरोना विषाणूच्या वाढत्या प्रसारामुळे बाजार समित्यांमध्ये गर्दी कमी करण्यासाठी सरकारने हा निर्णय घेतला आहे.  ‘‘देशात सध्या कोरोना विषाणूचा प्रसार वाढत आहे. त्यातच शेतकरी बाजार समित्यांमध्ये गर्दी करत असल्याने धोका वाढत आहे. त्यामुळे शेतकऱ्यांना बाजार समित्यांपासून दूर ठेवून त्यांचा शेतमाल विक्री करता यावा यासाठी सरकार प्रयत्नशील आहे. त्यामुळे केंद्रीय कृषीमंत्री नरेंद्रसिंह तोमर यांनी ‘ई-नाम’ची व्याप्ती वाढवत दोन नविन फिचर्स् चा समावेश केला आहे. यामुळे शेतकऱ्यांना प्रत्यक्ष बाजारात यावे लागणार नाही,’’ अशी माहिती सूत्रांनी दिली.  केंद्राने ‘ई-नाम’मध्ये आणलेल्या फिचरमध्ये वेअरहाऊसमधून व्यापार करण्याचे मॉड्यूल आहे. ‘ई-नाम’च्या सॉफ्टवेअरमध्ये वेअरहाऊसमधून ‘एनडब्ल्यूआर’ (इलेक्ट्रॉनिक नेगोशिएबल वेअरहाऊस रिसिट) प्रमाणे व्यवहार करण्याची सुविधा देण्यात आली आहे. दुसऱ्या फिचरमध्ये शेतकरी उत्पादक कंपन्यांना व्यवहार करण्याची सुविधा देण्यात आली आहे. शेतकरी कंपन्या बाजार समित्यांमध्ये शेतमाल न आणता त्यांच्या खरेदी केंद्रांवरूनच व्यवहार करू शकतात.  ट्रॅकिंगचीही सुविधा  ‘ई-नाम’ प्लॅटफॉर्मवर मंडी किंवा बाजार समित्यांअंतर्गत आणि राज्याराज्यांमध्ये व्यापारासाठी लॉजिस्टीकचे नवे मॉडेल वापरण्यात येणार आहे. लॉजिस्टीकच्या पातळीवर वाहतूक करताना खरेदीदारांना त्यांच्या मालाच्या वाहतुकीचे ट्रॅकिंग करता येणार आहे. याचा फायदा व्यवहारात पारदर्शकता येण्यासाठी होणार आहे, अशी माहिती सूत्रांनी दिली.