नगर : नवीन निकषांप्रमाणे फळपीक विमा योजनेचा लाभ होऊ शकणार नाही अशी भावना शेतकऱ्यांमध्‍ये निर्माण झाली आहे. ही योजना शेतकऱ्यांसाठी की विमा कंपन्‍यांच्‍या लाभासाठी? असा प्रश्‍न माजी मंत्री राधाकृष्‍ण विखे पाटील यांनी उपस्थित केला आहे. शेतकऱ्यांना दिलासा देण्‍यासाठी हवामान आधारित फळपीक विमा योजनेतील नव्‍या प्रमाणकांचा (ट्रीगर) तातडीने फेरविचार करून सुधारित निकष जाहीर करावेत, अशी मागणीही त्‍यांनी पत्राव्‍दारे मुख्‍यमंत्री उद्धव ठाकरे यांच्‍याकडे केली आहे.
पत्रकात म्हटले आहे की, राज्‍य सरकारने यावर्षी पुर्नरचित हवामान आधारित फळपीक विमा योजना लागू केली आहे. मात्र, योजनेतील निकष पाहिले तर सदरची विमा योजना ही शेतकऱ्यांच्‍या नव्‍हे तर कंपन्‍यांचे हित जोपासणारी असल्‍याचे स्‍पष्‍ट दिसते. फळपीक नुकसान संरक्षण कालावधीत भरपाई प्राप्‍त होण्‍यासाठी निश्चित केलेले प्रमाणके (ट्रीगर) हे वास्‍तव हवामान परिस्थितीच्‍या विपरित आहेत. पूर्वी या योजनेसाठी पावसाचा निकष दोन दिवसांसाठी होता, शिवाय पावसाचा खंड हे प्रमाणक होते. शासनाने यावर्षी या योजनेसाठी लागू केलेल्‍या निकषात जास्‍त पावसाचे निश्चित केलेले प्रमाणकच योजनेच्‍या लाभासाठी अडचणीचे ठरणार असल्‍याकडे विखे पाटील यांनी लक्ष वेधले आहे.
कमी पावसाच्‍या व कोरडवाहू शेतकरीच प्रामुख्‍याने फळ पिकांची लागवड करत असतो. वित्‍तीय संस्थांकडून कर्ज घेऊन या फळपिकांची जोपासना केली जाते. दरवर्षी कर्जदार शेतकऱ्यांना फळपीक विमा योजनेतील सहभाग सक्‍तीचा केला जातो. यावर्षी मात्र कर्जदार व बिगरकर्जदार शेतकऱ्यांचा सहभाग ऐश्चिक ठेवण्‍यात आला आहे. ही बाब शेतकऱ्यांबरोबरच बॅंकांनासुद्धा कर्जवसुलीसाठी अडचणीची ठरेल, फळपिकांच्‍या भरपाईसाठी निश्चित केलेले प्रमाणके स्‍थानिक हवामानाच्‍या विपरीत असून, विमा योजनेचा मूळ हेतूच या नव्‍या निकषांमुळे संपुष्‍टात आलेला आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.