परभणी जिल्ह्यात मनरेगाअंतर्गत १४६ हेक्टरवर फळपीक लागवड

परभणी ः महात्मा गांधी राष्ट्रीय ग्रामीण रोजगार हमी योजनेअंतर्गत यंदा जिल्ह्यात १ हजार ४५१ हेक्टरवर फळपीक लागवडीचे उद्दिष्ट होते, परंतु जिल्ह्यात उद्भवलेल्या दुष्काळी स्थितीमुळे फळपीक लागवडीसाठी पाणी उपलब्ध न झाल्यामुळे केवळ सात तालुक्यांमधील १८० शेतकऱ्यांनी १४६.३५ हेक्टरवर फळपीक लागवड केली. या संदर्भात कृषी विभागाच्या सूत्रांनी माहिती दिली.

जिल्ह्यात यंदा विहित कालावधीत जिल्ह्यातील १ हजार ९३ शेतकऱ्यांनी ८३८.७० हेक्टरवर फळपीक लागवडीसाठी प्रस्ताव दाखल केले होते. त्यापैकी १ हजार ५९ शेतकऱ्यांच्या ८०६.६० हेक्टरवर फळपीक लागवडीसाठी तांत्रिक मान्यता देण्यात आली, परंतु ८१७ शेतकऱ्यांना ६२८.२० हेक्टरवर फळपीक लागडीसाठी मंजुरी देण्यात आली. फेब्रुवारीअखेर १८० शेतकऱ्यांनी १४६.३५ हेक्टरवर फळपीक लागवड केली आहे. 

परभणी तालुक्यात फळपीक लागवड करणाऱ्या शेतकऱ्यांची संख्या सर्वाधिक १३० असून, त्यांनी १०९.२० हेक्टरवर फळपीक लागवड केली आहे. जिंतूर आणि पूर्णा तालुक्यात मनरेगाअंतर्गत फळपीक लागवड झाली नाही. फळपिकनिहाय लागवड क्षेत्राचा विचार केला असता, संत्रा फळपिकाची सर्वाधिक ८२ शेतकऱ्यांनी ७९.७० हेक्टरवर लागवड केली. 

दुष्काळी स्थितीमुळे फळपीक लागवडीसाठी ८.९ हेक्टरवर खड्डे खोदलेल्या शेतकऱ्यांना लागवड करता आलेली नाही. प्रशासकीय मंजुरी दिलेल्या क्षेत्रापैकी ४८१.८५ हेक्टर क्षेत्रावर लागवड झाली आहे.