पेट्रोलियम दरांत कपातीची आज घोषणा होण्याची अपेक्षा

नवी दिल्ली : देशाबाहेर पळालेला मद्यव्यावसायिक विजय मल्ल्या याला देश सोडण्याआधी संसदेत उघडपणे भेटल्याचे आरोप झाल्यावर अर्थमंत्री अरुण जेटली यांनी आज प्रथमच पंतप्रधान नरेंद्र मोदी यांची भेट घेतल्याची माहिती आहे. रुपयाच्या घरंगळण्याचा क्रम चालूच असून, पेट्रोलियम दरवाढीचा भडका उडाल्यानंतर सामान्यांमधील असंतोषाच्या पार्श्‍वभूमीवर मोदींनी उद्या (ता. 15) बोलावलेल्या "इकॉनॉमिक फोरम'च्या बैठकीची पार्श्‍वभूमी आजच्या भेटीस असल्याचे सांगितले जाते. उद्याच्या बैठकीअंती पेट्रोलियम दरांत कपात करण्याबाबतची काही घोषणा सरकारच्या पातळीवरून होण्याची अपेक्षा आहे. जेटलींनी मल्ल्याला पळून जाण्याआधी भेटून टिप्स दिल्याचा कॉंग्रेसचा आरोप आहे. जेटलींनी मल्ल्याला कोणता कानमंत्र दिला याचा पर्दाफाश करण्यासाठी कॉंग्रेसने रोज पत्रकार परिषदा घेण्याचा सपाटा सुरू केला आहे. या पार्श्‍वभूमीवर जेटली-मोदी चर्चेत मल्ल्या प्रकरणाला स्पर्श झाल्याची शक्‍यता नाकारता येत नाही. मात्र अधिकृतरीत्या "इकॉनॉनमिक फोरम' बैठकीच्या पूर्वसंध्येला देशाच्या अर्थमंत्र्यांची पंतप्रधानांशी चर्चा इतकाच धागा बैठकीच्या खोलीतून बाहेर आला आहे. पेट्रोलियम दरवाढीचा आलेख खाली येण्याची व सामान्यांचा रोष कमी होण्याची चिन्हे नाहीत. असा स्थितीत उद्या पंतप्रधान सामान्यांना दिलासा देण्याच्या उपायांबाबत चर्चा करतील. पेट्रोल-डिझेलवरील उत्पादन शुल्क घटविण्याचा प्रस्ताव सरकारने फेटाळून लावला आहे. गेल्या 42 दिवसांत कच्च्या तेलाच्या आयात शुल्कात तिपटीहून जास्त वाढ झाल्याने व त्याचे दरही वाढत असल्याने सरकारमध्ये चिंतेचे वातावरण आहे. "उज्ज्वला'सारख्या मोदींच्या जिव्हाळ्याच्या योजना वगळता इतर योजनांवरील सरकारी खर्च घटवून काही प्रमाणात दिलासा मिळू शकतो. 2013 मध्ये यूपीए सरकारने परकीय गंगाजळीत वाढ करण्यासाठी प्रवासी भारतीयांसाठी बॉंड जारी केले होते त्याचा परतावा मोदी सरकारला 2016-17 मध्ये करावा लागला होता. आता खुद्द मोदी सरकार तशाच योजनेवर विचार करत असल्याचीही माहिती आहे.