जलसंधारण कामांसाठी पुणे जिल्ह्याला ११ कोटी ९२ लाखांचा निधी मंजूर

शेटफळगढे, जि. पुणे  : जिल्ह्यातील जलयुक्त शिवार योजनेअंतर्गत २०१८-१९ या वर्षासाठी निवडलेल्या २१३ गावांमधील जलसंधारणाची कामे करण्याकरिता जलसंधारण विभागाने जिल्ह्यासाठी ११ कोटी ९२ लाखांचा निधी मंजूर केला आहे.

या वर्षात निवड झालेल्या २२३ गावांमध्ये नाला खोलीकरण, सिमेट बंधारे, समतल चर, कपार्टमेंट बंडिंग या व इतर स्वरूपाची जलसंधारणाची कामे सरकारच्या जलसंधारण, वन, कृषी व जिल्हा परिषदेच्या छोटे पाटबंधारे विभागाच्या माध्यमातून सुरू आहेत. मात्र जानेवारीपासून निधीअभावी यातील अनेक कामे रखडली होती. सरकारने १२ एप्रिलच्या शासन निर्णयाच्या जिल्ह्यातील २२३ गावांमधील जलसंधारणाच्या कामासाठी पाच कोटींचा निधी वितरित केला होता. मात्र तरीही जलसंधारणाच्या कामांना अपेक्षित वेग आला नव्हता. म्हणूच ही बाब विचारात घेऊन जलसंधारण

विभागाने १ मार्च २०१९ च्या शासन निर्णयाच्या आधारे या अभियानअंतर्गत निवडलेल्या २२३ गावांमधील कामे पूर्ण करण्यास ३१ डिसेंबर २०१९ अखेर मुदतवाढ दिली आहे. या कामांना अधिक गती देण्यासाठी १० मेच्या शासन निर्णयाच्या आधारे जिल्ह्याला या कामांसाठी ११ कोटी ९२ लाखांचा निधी मंजूर करून हा निधी जिल्हाधिकारी कार्यालयाकडे वर्ग केला आहे. जिल्हाधिकाऱ्यांमार्फत हा निधी जलसंधारणाची कामे करीत असलेल्या सरकारच्या सर्व यंत्रणांना कामनिहाय वितरित केला जाणार आहे. जिल्ह्याला उपलब्ध झालेल्या या निधीबाबतचे आदेश या विभागाच्या अवर सचिवांनी १० मेच्या शासन निर्णयाच्या आधारे या संबंधित सर्व कार्यालयाला दिले आहेत. निधी उपलब्धतेमुळे यापुढील काळात या कामांना गती मिळण्याचा मार्ग मोकळा झाला आहे.