पुणे जिल्ह्यात जलसंधारण उपचारांसाठी ७० लाखांचा निधी मंजूर

पुणे   ः आदिवासी क्षेत्राबाहेरील उपयोजनेअंतर्गत (ओटीएसपी) चालू वर्षी आदिवासी शेतकऱ्यांच्या शेतावर मृद व जलसंधारणाचे विविध उपचार राबविण्यात येणार आहे. त्यासाठी जिल्हा वार्षिक योजनेतून ७० लाख रुपयांचा निधी मंजूर झाला आहे. पुणे जिल्ह्यातील इच्छुक आदिवासी शेतकऱ्यांनी संबंधित कृषी पर्यवेक्षक, कृषी सहायकांशी संपर्क साधावा, असे आवाहन जिल्हा अधीक्षक कृषी अधिकारी यांनी केले आहे.

आदिवासी शेतकऱ्यांना उत्पन्नाचे इतर कायमस्वरूपी साधन नसते. त्याचे संपूर्ण क्षेत्र सिंचनाखाली आणण्यासाठीच्या मर्यादा लक्षात घेता कृषी उत्पन्नात वाढ करण्यासाठी पाणलोट विकास कार्यक्रम राबविण्यात येतो. आदिवासी शेतकऱ्यांच्या उत्पन्नात वाढ करून त्यांचे राहणीमान सुधारणे व त्यांचे स्थलांतररोखणे यासाठी शंभर टक्के अनुदानावर ही योजना राबविण्यात येते.

या योजनेअंतर्गत आदिवासी लाभार्थ्यांनी संमती घेऊन त्यांच्या वैयक्तिक क्षेत्रावर मृद व जलसंधारणाचे विविध उपचार घेण्यात येतात. यामध्ये सलग समतल चर, कंपार्टंमेंन्ट बंडिंग, अनघड दगडी बांध, शेततळे, मजगी, जुनी भात शेती दुरुस्ती व सामूहिक स्वरूपाचे माती नाला बांध, सिंमेट नाला बांध अशा विविध स्वरूपाचे उपचार घेण्यात येतात. या योजनेअंतर्गत लाभ घेण्यासाठी आदिवासी असल्याचा दाखला, सात - बारा उतारा व आठ अ उतारा अशी कागदपत्रे आवश्यक आहेत. या योजनेअंतर्गत लाभ घेऊ इच्छिणाऱ्या शेतकऱ्यांनी कृषी विभागाच्या तालुका कृषी अधिकारी, मंडळ कृषी अधिकाऱ्यांशी संपर्क साधावा.