गडचिरोलीतील १२६९ गावांची सरासरी पैसेवारी ६२ पैसे

गडचिरोली : तांत्रिक कारणामुळे जिल्ह्याची अंतिम पैसेवारी उशिरा जाहीर करण्यात आली. ती सरासरी ६२ पैसे इतकी आली. त्यानुसार जिल्ह्यातील १२६९ गावांत दुष्काळ नाही. शासनाद्वारे अवघ्या २०८ गावांची पैसेवारी ५० पैशांच्या आत काढण्यात आली आहे. 

या वर्षीची अंतिम पैसेवारी ३१ डिसेंबरपर्यंत जाहीर करण्याचे निर्देश सरकारकडून देण्यात आले होते. परंतु काही तालुक्‍यांची माहिती येणे बाकी असल्यामुळे जिल्ह्याची पैसेवारी काढण्यास विलंब लागला. जिल्ह्यातील एकूण १६८८ गावांपैकी खरीप पिकाची १५३९ गावे आहेत. त्यापैकी पीक नसलेली गावे ६२ आहेत. एकूण लागवडीखाली असलेल्या १ लाख ८८ हजार ५४८.५७ हेक्‍टर क्षेत्रापैकी यंदा एक लाख ७२ हजार ५०८.७९ हेक्‍टरवर खरीप पिकांची लागवड झाली. विशेष म्हणजे राज्य शासनाने दुष्काळ घोषित केलेल्या १५१ तालुके व २६८ महसूल मंडळांत जिल्ह्यातील एकाही गावाचा समावेश नाही. 

अंतिम पैसेवारीनुसार यंदा अहेरी तालुक्‍यातील सर्व ११८ गावांतील पैसेवारी ४६ आली. भामरागड तालुक्‍यातील ९० गावांची पैसेवारी ५० पैशांच्या आत, तर १६ गावांची पैसेवारी ५० पैशांपेक्षा जास्त आहे. सिरोंचा तालुक्‍याची पैसेवारी सर्वाधिक म्हणजे ६८ पैसे आली. 

अशी आहे पैसेवारी