लोणंद बाजारात गरवा कांदा दरात सुधारणा

लोणंद, जि. सातारा : हळव्या व गरव्या कांद्याच्या आवकेत घट होत असल्याने लोणंद कृषी उत्पन्न बाजार समितीच्या आवारात गुरुवारी झालेल्या कांद्याच्या बाजारात लिलावा दरम्यान हळव्या लाल कांद्याचे भाव प्रतिक्विंटलला ३ हजार ४००, तर गरव्या कांद्याचे भाव ४ हजार ८५१ रुपयांपर्यंत तेजीत निघाले आहेत. 

हळव्या व गरव्या कांद्याची केवळ ८०० पिशव्यांची आवक झाली आहे, अशी माहिती बाजार समितीचे सभापती राजेंद्र तांबे व उपसभापती दत्तात्रय बिचुकले यांनी दिली. मार्केट यार्डात सध्या हळव्या लाल कांद्याचा हंगाम सुरू आहे. मात्र, अतिवृष्टीमुळे कांदा पिकाला फटका बसला आहे. अति पाण्यामुळे काढलेला कांदा शेतातच नासून नुकसान झाले. त्यामुळे शेतकरी हाती लागलेला कांदा शेतातून काढून काटून व वाळवून बाजारात विक्रीसाठी आणत आहेत. 

बाजारात कांद्याला चांगला भाव असला तरी शेतकऱ्यांकडे विक्रीसाठी कांदा नाही, अशी अवस्था आहे. दरवर्षी दिवाळीपूर्वी मार्केटमध्ये हळव्या लाल कांद्याचा हंगाम सुरू होतो. या वर्षी मात्र, अतिवृष्टीमुळे कांदा उत्पादकांचे कंबरडे मोडले आहे. बाजार समितीच्या कार्यक्षेत्रात सर्वत्र कांद्याच्या मोठ्या प्रमाणावर लागवडी होऊनही पावसाने त्यावर पाणी फिरले आहे. दिवाळी संपूनही कांद्याची तुरळक आवक होत आहे. साठवणुकीच्या गरव्या कांद्याचीही तुरळक आवक होत आहे. त्यामुळे गरव्या कांद्याचे भावही तेजीत निघत आहेत. 

गेल्या आठवड्यात गरवा कांदा प्रतिक्विंटलला पाच हजार रुपयांवर होता, तर आजच्या बाजारातही गरवा कांदा ४ हजार ८५१ रुपयांपर्यंत प्रतिक्विंटलला तेजीत विकला गेला. किरकोळ बाजारातही कांद्याचे भाव चांगलेच कडाडले आहेत. ग्राहकांना ६० ते ७० रुपये प्रतिकिलो दराने किरकोळ विक्री सुरू आहे. दरम्यान, कांदा प्रतवारी करून चांगला वाळवून बाजारात विक्रीसाठी आणण्याचे आवाहनही बाजार समितीचे सचिव विठ्ठल सपकाळ यांनी केले. बाजारात हळव्या व गरव्या कांद्याची मिळून फक्त ८०० पिशव्यांची आवक झाली होती.