वडापूर बंधाऱ्याचे दरवाजे गेले वाहून

मंगळवेढा, जि. सोलापूर : वडापूर बंधाऱ्यावर काढून ठेवलेले दरवाजे भीमा नदीला आलेल्या पुराने वाहून गेले. त्यामुळे भविष्यात या भागातील बागायत शेतीला याचा मोठा फटका बसणार आहे. पाटबंधारे खात्याच्या ढिसाळ कारभारामुळे ही घटना घडल्याची बोलले जाते. जुलै महिन्यात या बंधाऱ्याचा भराव वाहून गेल्याची घटना ताजी असतानाच आता ही बाब समोर आली. 

लाभक्षेत्रात पडलेल्या पावसामुळे उजनीतून ३० हजार, तर वीरमधून ५४ हजार ४७८ क्‍युसेक पाणी भीमा नदीत सोडल्यामुळे सध्या तालुक्‍यामध्ये नदीला पूर आला आहे.

सुरक्षिततेचा उपाय म्हणून वडापूर बंधाऱ्यावरील बंधाऱ्याचे दरवाजे ऑक्‍टोबरमध्ये पुन्हा बसविण्यासाठी बंधाऱ्यावर काढून ठेवले होते. परंतु पुरादरम्यान ते उचलून न नेल्यामुळे ते वाहून गेले. त्यामुळे पावसाळ्यानंतर पाणी साठवण्याच्या दृष्टीने पाटबंधारे खात्याकडून मंजुरी घेऊन नवीन दरवाजे करण्यासाठी बराच कालावधी लागणार आहे. त्यामुळे या भागातील शेतीला पाणीटंचाईचे संकट जाणवणार आहे.