थकीत तूर चुकाऱ्यावर १८ टक्‍के व्याज द्या

तूर
तूर

अमरावती  ः शासनाकडून हमीभावाने खरेदी होणाऱ्या शेतमालाचे चुकारे वर्षभरापासून थकीत आहेत. त्यावर १८ टक्‍के दराने व्याज मिळावे, अशी मागणी सरपंच संघटनेकडून मुख्यमंत्र्यांना करण्यात आली आहे. जिल्हाधिकाऱ्यांमार्फत पाठविण्यात आलेल्या या निवेदनानुसार, शासनाकडून २०१६-१७ या वर्षापासून  हमीभावाने शेतमाल खरेदी केली जात आहे. त्यामध्ये तुरीचादेखील समावेश आहे. तूर हे शेतकऱ्यांचे मुख्य व नगदी पीक असल्यामुळे तुरीच्या पैशावर आर्थिक नियोजन शेतकरी करतात. बॅंकेचे कर्ज, इतर देण्याघेण्याचे व्यवहारदेखील केले जातात. परंतु गेल्या तीन वर्षांपासून शासनाकडून खरेदी केलेल्या तुरीचे चुकारे देण्यास विलंब होत आहे. परिणामी, शेतकऱ्यांना सर्व कर्जाचा भरणा व व्यवहार वाढीव व्याज चुकते करून करावा लागत आहे.  बॅंका एक दिवस जरी कर्ज  परतफेडीस उशीर झाला, तर व्याज आकारतात. हेच धोरण शासनाकडे थकीत असलेल्या चुकाऱ्यांनादेखील लागू झाले पाहिजे. शासनाने गेल्या वर्षभरापासून तूर खरेदीचे चुकारे दिले नाहीत. महाराष्ट्र कृषी उत्पन्न बाजार समिती कायद्यात शेतमालाच्या खरेदी केल्याबरोबरच चुकारे २४ तासांत देण्याची अट आहे. कायदेशीर तरतूददेखील तशीच आहे. उच्च न्यायालयानेसुद्धा २००५ मध्ये कापूस खरेदीसंदर्भात पणन महासंघाने कापूस या शेतमालाचे चुकारे विलंबाने दिल्यामुळे कमीत कमी १० टक्‍के व्याज देण्याचे निर्देश दिले आहे. शेतमालासंदर्भात उच्च न्यायालयाने दिलेले निर्देश व बाजार समिती कायद्यातील तरतुदीप्रमाणे तुरीच्या थकीत चुकाऱ्याला १८ टक्‍के व्याज दिले जावे, अशी मागणी आहे.  निवेदनकर्त्यांमध्ये गजानन बोंडे, मोहन चव्हाण, बाबाराव दहिकर, सुनील डाहाके, महम्मद गुलाम नबी, सुरेंद्र वानखडे, आशुतोष देशमुख, नारायण पर्वतकार, दिलीप ढोके यांचा समावेश होता.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com